Raqosa: Na veidalo

ERA sa raqosa mai na dalo, ka sa vakilai na draki mamaca se na lauqa ena loma ni tikina o Wainunu mai Bua.

E vakaraitaka mai ki na Nai Lalakai o Tui Wainunu, Ratu Orisi Baleitavea e na siga Moniti nira sa vakila na lewenivanua kei na nodra i teitei na kena sega ni tau tu oqo na uca ena loma ni dua na vula.

Na neimami veidalo, era sa raqosa mai ka tara kece na walu na veikoro ena loma ni tikina, e kaya.

E kuria ni na kaciva e dua na bose ni tikina me na veitalanoataki kina na cava mera na cakava na lewe ni tikina me wali kina na leqa oqo.

Keimami sa veitalanoataka tiko, de rawa ni wali na leqa oqo ena kena vakayacori na masumasu, de dua beka ena rawa ni walia ena veika vakayalo, e kaya o Ratu Orisi.

Ena vakayacori na bose ni tikina ena koro o Saolo ka ulutaga ena veitalanoataki, oya na lauqa e sa tara na loma ni vanua kei na i teitei kei na manumanu.

E vakadeitaka ni a tau ga vakailai na uca ena mua ni macawa, ia, e gadrevi vakalevu na uca, ena todra ni siga ka ra sa laki mate kina na i teitei, ka nodra i vurevure ni i lavo na lewenivanua e Bua.

Mai na yasayasa vaka- Ra, e kaya na Talai Veivuke o Luke Moroivalu ni sa vakayagataki oti e $200,000 ena kena kau na wai ni gunu vei ira era sotava tiko na draki mamaca ena noda vanua.

E kaya o Moroivalu ni saga tiko na matanitu na nona i gu me na cicivaki vinaka na veiqaravi era gadrevi vakabibi ena gauna vakaoqo. E kaya ni se bera ni dua na i tukutuku e taura mai vei iratou na tabana ni bula ena kena vakaleqai e dua na bula mai na draki mamaca e sotavi tiko.

Latest posts

More Stories