Qele kovuti

Update: 10:48AM ERA vakanomodi na tiko e na loma ni valevakoro mai na koro ko Muaivuso e na yavusa o Navukavu, Tikina o Suva, e na siga Moniti ni vakarau vakayacori na vosa bubului ni kena vakasukai e rua na qele ni mataqali ni oti e 110 na yabaki.

Ia na i otioti ni vakatulewa ena tikina oqo ena qai lewa mai o ira na lewe ni Bose Lawa e Palimedi, oya ena nodra na dabe vata tale ka tarava  na matabose oqo, e vakamatatataka na Tabana ni Qele Maroroi ( TLTB).

Ena nona vakarota o Akuila Raibevu mai na tabana ni Qele Kovu e na valenivolavola ni Tabana ni Qele Maroroi e tukuna kina ni qele ni mataqali e rua, a ya na mataqali Natabuivalu kei na mataqali o Natodre ka veivosakitaki e na siga oya, e dodonu me ra duavata kina na lewe ni nataqali ni bera ni vakayacori na vosa bubului.

Ni sa oti na nona vosa o Raibevu, sa qai soli na gauna vei rau na mataqali e rua, me ratou bosea kina na veika e ratou vakatututaka ki na na nodratou sa vinakata me ratou taura se lewa na nodratou qele ni mataqali. Na gauna e sa oti kina na nodra bose vakamataqali rau sa qai gole yani e ya rua na turaga ka ra sa lomavata kina na mataqali e rua, me rau la�ki matataka na nodratou mataqali e na matai Raibevu kei na Roko Tui Rewa.

Ni se bera na vosa bubului e vakamacalataka vei ira na lewe ni yavusa ko Navukavu o Raibevu, ni dodonu me ra kila vinaka ni dua ga na tavere se veiba e na yaco e na gauna ni vosa bubului, e sa na tarovi talega e kea na bose.

Oti oya e rau sa qai tarogi na mata mai na mataqali e rua e na 4 na taro.

Na i matai me rau kila na i wiliwili ni lewe ni mataqali e na nodrau dui mataqali.

Karua ni taro me rau kila na i wiliwili ni qele erau dui taukena.

Na i katolu ni taro me rau vakamacalataka na veika e sa vakayacori tiko e na nodratou qele, kei na kena i ka va ni taro me rau dui vakamacalataka na i balebale ni nodratou via kovuta na nodratou dui tiki ni qele.

Ni se bera ni tekivu na vosa bubului, e a kaci taumada na turaga ni koro ko Muaivuso me vakaraitaka e loma ni koro ni sa vakarau vakayacori e dua na cakacaka bibi. Ni qai 12 donu na kaloko e na sigalevu sa tekivu na taro vei rau na mata mai na mataqali o Natabuivalu, a ya o Peceli vata kei Seveci Naisilisili, e na nodrau vosa bubului e na i Vola Tabu ka vakatotomuri Eseroma Kuruwale mai na Tabana ni Qele Maroroi.

Dede ga vakalailai rau sa vakatarogi sara o Tevita Qounadovu kei Joape Tukitoga (Roko Baleni) mai na mataqali Natodre e na taro vata ga e tarogi vei rau na mataqali Natabuivalu.

Ni sa oti na vosa bubului, sa qai kacivaka tale o turaga ni koro ni sa oti na cakacaka bibi ka vakayacori tiko e nakoro, ni bera ni qai mai masulaka na i Vakatawa ni sa oti na vosa bubului.

E kaya o Raibevu ni veika e sa macala mai na koro ko Muaivuso, e sa na qai la�ki tau mai na otioti ni lewa e na gauna e dabe kina na Palimedi ka tarava.