O cei e na sauma nai vakadei ni livaliva

Update: 10:26AM ESA dodonu mera na tarova na i taukei ni vale redetaki na nodra dau lavaka tiko vei ira na daurede nai vakadei ni akaude ni livaliva dau saumi vua na Matabose ni Livaliva ena noda vanua.

E via tokarua taka na Matabose ni Dauvolivoli vei ira nai taukei ni vale ni kevaka e volai tiko na yacadra ena akaude ni livaliva vei iratou na Matabose ni Livaliva ena noda vanua e kena i balebale ni nodra i tavi mera na sauma na i vakadei ni akaude ni livaliva.

Na veivakananumi oqo e vu mai ena kudru e mai ciqoma tiko na Matabose ni Dauvolivoli mai vei ira na daurede ko era sa dau vakasaurara taki mai vei ira na itaukei ni vale mera sauma nai vakadei ni livaliva dina ga ni volai tu vua nai taukei ni vale na akaude ni livaliva.

Ena Wase 62 (1) kei na (2) ni lawatu na Electricity Act(Cap 180), e sa vakamatata taki tu kina ni ko ira kece na dauvolivoli ka vaka akaude ena Matabose ni Livaliva ena noda vanua e dodonu me na sauma na i vakadei ni akaude ni livaliva.

E rawarawa sara ka matata na kena i lakolako na tikina oqo, oya kevaka e volai tiko vua nai taukei ni vale na akaude ni livaliva, e dodonu mena sauma ko koya nai vakadei ni akaude ni livaliva.  Ka kuria oqo, ni na sauma lesu ga nai lavo oqo na Matabose ni Livaliva, ki vua na dauvolivoli e volai koto na yacana ena akaude ni livaliva.

E sa kauwai sara vakalevu na Matabose ni so vei ira na itaukei ni vale e ra sega ni cegu na nodra sasaga mera kelia na nodra taga na dauvolivoli ena nodra lavaka tu e so na veika vakaoqo mera sauma na dauvolivoli dina ga ni volai tu vei ira na akaude ni livaliva.

E sa ciqoma rawa e so na kisi na Matabose, ena kena tukuni vei ira na daurede mera sauma na ivakadei ni akaude ni livaliva ena gauna era tawana kina na vale era rede taka. Ena vuqa na gauana e sega nira kila na daurede na ka mera cakava ka ra sa dau sauma ga na ivakadei ni akaude ni livaliva.

Ena ituvaki vakaoqo ena vinaka mena volai vua na daurede na akaude ni livaliva, baleta, nina sauma lesu vua nai vakadei oqo na Matabose ni Livaliva ena gauna e vakagalala taka kina na vale e redetaka tiko.

Ena vinaka vei ira na dau ede mera na dau dikeva vinaka na nodra veidinadinati ni rede ka bibi mena vakamatata taki toka kina se na volai vei cei na akaude kei na mita ni livaliva era na vakayagataka, ka me matata talega se ko cei ena sauma nai vakadei ni akaude ni livaliva.

Latest posts

More Stories