Nanamaki na lewe ni vanua

Update: 8:51AM E DUA nai wase ni vanua levu ka ra dau veitokoni e na FijiFirst e ra sa na namaka tiko ni ratou na vakayacora kece na nodratou yalayala ka ratou vunautaka wavoki tiko ni se bera na veidigidigi me vaka na:

Wainimate

Ena solia wale o FijiFirst na wainimate kece ka vola mai o vuniwai ka tarovi tiko na tubu ni kena i sau e na gauna oqo me baleti ira kece na lewe i Viti ka lailai mai na $20,000 na nodra rawa-ka-vakailavo ena dua na yabaki. Oqo e oka kina na wainimate me baleta na mate sega ni dewa na NCD. E sa tikici tani tiko e $8 na milioni na dola me baleta na veivuke oqo e na vukudra na lailai na nodra rawa-ka.

Na Wai

Ena solia wale o FijiFirst e 91,250 na lita na wai e na veiyabaki vei ira na veivuvale kece sara e Viti ka lailai mai na $30,000 dua na yabaki na nodra rawa-ka vakailavo. Keitou cakacakataka na fika oqo mai na rivote ni World Health Organization ka laurai kina vakacaca, mai na 5 na lewe ni vuvale, ni dua e vakayagataka rawa e 50 na lita na waie na dua na siga.

O ira na Noda Gone

Ena solia wale o FijiFirst e 250ml na sucu bvei ira na gone Kalasi Dua e na koronivuli kece sara (Primary) tekivu e na i matai ni wasewase ni vuli ni yabaki mai oqo. E sa vakayacori tiko e na gauna oqo na veitalanoa kei na Fiji Dairy Limited ka tiko na kena i sau ena $2.5 na milioni na dola.

Veivakatorocaketaki ni Qele ni i Taukei. Ena tikica tani o FijiFirst e $10 na milioni na dola me vukei ira na i Taukei me ra cakacakataka na nodra qele e na kena vidavidai me volitaki kei na veivakatorocaketaki. Dua na gauna balavu, era soli lisi tu na i Taukei ni qele vei ira na tani me ra cakailavo tu kina. Oqo ena vakauqeti ira na i Taukei ni qele me ra cicivaka ga na nodra bisi8nisi e na nodra kumuna ga vakai ira na i lavo mai na nodra qele dina. Na i lavo oqo e na soli vakailoloma (grant) me vukei ira na i taukei ni qele me ra sauma kina na cakacaka ni veivakatorocaketaki, me vaka na dodo ni livaliva, na wai kei na kena ta na gaunisala. Na sasaga oqo e na sega walega ni vakaukauwataki ira na i Taukei, ia, ena veivuke talega ki na bula vakailavo ni noda vanua.

Veivakalivalivataki

Ena vakatubura na FijiFirst na i vakatagedegede ni livaliva mai na 75 na kilowatts ki na 85 na kilowatts dua na aua vei ira na vuvale era sega ni rawa-ka vakailavo vinaka sara.

Lavo musuki

Esa yalataka na FijiFirst ni vakatekivu e na i matai ni siga ni Janueri e na yabaki mai oqo e sa na vakatubura e na 10 na pasede na i lavo e musuka o koya na i taukei ni cakacaka ki na Tabana Ni Lavo Musuki (FNPF), ka musuka tikoga e 8 na pasede o koya ka cakacaka tiko. Era na sega ni saumi vakacavacava talega na tamata cakacaka.