Na veiwekani nei Bure kei Nakoilava

NA veiwekani e tiko vei keitou e Nakoilava kei ratou mai Bure (Bureivanua kei Bureiwai) e matata vinaka tiko ka ra se maroroya vinaka tiko ga.

E vakaraitaka ko Josefa Naqaranivalu ni tiko na i sema ni veiwekani nei Bure kei Nakoilava.

O keimami na kai Nakoilava keimami veitabuki kei Bure ka keimami veitabani talega, e kaya o Naqaranivalu.

E tomana e na nona i talanoa o Naqaranivalu ni rau veitabuki e na ika kei na vuaka, e kedra na turaga ni Bure na vuaka ka kedra mai Nakoilava na ika kei na niu.

Na koro vakaturaga o Bucalevu e na tikina o Nakorotubu e na yasana vakaturaga o Ra e lima na yavusa era tiko kina ka matata vinaka tu na kena veiwekani ka ra se maroroya vinaka o ira na kena kawa.

Oya na veika e vakaraitaka na turaga yabaki 84 mai Bucalevu ena nona vakatarogi ena tabana ni Nai Lalakai e na macawa sa oti.

E vakaraitaka o Naqaranivalu na lima na yavusa qo ena daku ni kuila e kilai na yavusa o Nakoilava, Nawaidina, Vora, Wailada kei na yavusa o Ralagi.

Ia, e na loma ni kuila esa vakaoqo na yaca ni yavusa e tiko qo e Bucalevu oya na yavusa o Namatagai, Vora, Nawaidina, Wailada kei na yavusa o Nakoilava.

Na yavusa o Namatagai e wili tiko kina na mataqali o Namatagai, Nakorobaba, Waimaro, Nakasegaci, Nasaumaki, Natoadamu, Nakorotubu, e kaya o Naqaranivalu.

E tomana o Naqaranivalu ni o ira na veimataqali era tiko e na ruku ni yavusa o Namatagai era a qai mai vakacokotaki vata me rawa ni dua na yavusa o Namatagai e na loma ni kuila.

Ea mai yaco na veika oqo ena vuku ni kena sa mai vakarorogo o Nakoilava ka vakarurugi talega i Bure.

Na yavusa qo o Namatagai e nodratou manumanu na reba, ika na vo siga ka nodratou kau na vaivai, e kaya o Naqaranivalu.

E kaya na turaga ni Bucalevu qo ni yavusa o Vora e rua na kena mataqali oya na mataqali o Vora kei na mataqali o Dakuitoga. E kaya ni yavusa o Nawaidina e rua na kena mataqali oya na mataqali ko Nawaidina, Sovakinadawa.

Na yavusa o Wailada e rua na kena mataqali oya na mataqali o Nabolo kei na mataqali o Corika, e kaya o Naqaranivalu.

Nai ka lima ni yavusa oya ko Nakoilava mataqali o Nakoilava, Lutukinakodro, Nasoki.         Ena qai tomani tale yani.

Latest posts

More Stories