Na veibuli ni Kalou

Oqo na i kuri ni nona cau o Nai Talatala Iliesa Naivalu me baleta na talei ni nona veibuli na Kalou kei na nona veivakarautaki e Iteni. Ni wiliwili sara yani.

Na kena moici vakatani na i naki ni Kalou
Sa dua tiko na leqa ni tagane edaidai na kena sa vakadukadukalitaki nona vakasama me garogaro ca ka vakanananu vakatani ni raica e dua na yalews ni vakaisulu musu, se me basika toka e so na tiki ni yagona.

Sa yaco kina na kucu, na veivaqaseni kei na veitovo lolovira e vuqa. Sa qai beitaki o yalewa ni vakavuna na veicala lelevu vakaoya. Na veibeitaki ga a yaco ena were e nai vakatekivu, sa tomani tu ga mai ka sa qai toso cake tikoga ena levu ni itovo lolovira sa vakaitavi tiko kina na tagane ena gauna oqo.

Eso sa lai vakayacori sara nai valavala lolovira vei ira na luvedra dina, na wekadra voleka – na vugodra, na makubudra kei na nodra gone susu. Sa vakani cala na vakasama ni veiyacovi, sa na yaco ga e na gauna erau sa tiko taurua kina e dua na tagine kei na yalewa, veitalia se o cei, veiwekani se sega.

Sa yaco kina na tiko vakataurua ena tikina lala me sa laiseni se ivolatara ni kena vakayacori na veiyacovi – veitalia ke qase se gone, vinakata se sega ka veitalia ke mani tiki ni yagomu sara mada ga.!

Oqo sa dua nai tutu ni bula vakadomobula ka qai kena ikuri ni sa sega ni caka rawa e dua na ka me wali kina na leqa.

Na yalewa kei na veiwekani era sa na vakatukutuku ga, ko ira na ovisa era sa na veivesu tiko ga, na mataveilewai sa na tauca tiko ga nai totogi, ko iratou na tabana ni veivakadodonutaki eratou sa na qarava tikoga na sasaga ni nodra vakadodonutaki kei iratou na Women’s Crisis Centre eratou sa na kailavaka tiko ga me vakalevutaki na itotogi.

E nai tuvatuva eda muria tiko oqo, e sega sara ga ni wali tiko na leqa. Eda palasitataka tiko ga na dela ni mavoa, ia na mavoa e loma sa qai tete ga. Sa qai toso cake tiko ga nai wiliwili ni itovo lolovira ni veivakalolomataki e yaco ena veisiga.

Na leqa oqo e leqa vakayalo. Vakavo sara ke raici vakayalo ka da lesu ki na inaki ni Nona buli keda na Kalou ka da lesu tale ki na Nona ivakaro me baleta na bula veimaliwai ni tagane kei na yalewa, sa na rawa ni da qai walia na leqa.

Meda lesu tale mada ki na were o Iteni. O Atama kei Ivi erau tiko luvawale voli e na loma ni were ena loma ni vica vata na siga se macawa, ia erau sega ni bau veiyacovi.

E rau wele ena nodrau marautaka na bula kei na milioni na ibulibuli talei ni Kalou e tu wavoliti rau.

E kaya nai Vola Tabu e na Vakatekivu 2:25 – Ä rau sa luvawale, na tagane kei na watina, e rau sa sega ni madua.”

E qai curu ga na madua e na gauna e rau sa ivalavala ca kina, ka rau sa cula vata na draunikau me rau vakaisulu kina.

Oqo me sa ivakavuvuli levu vei keda, ni yago ni tagane kei na yalewa kei na kena veigagadre titobu, sa ka me vakatulewataki ka sega ni ka me da ravi se kuitaki ki na garogaro ca ni lomada.

Na garogaro ca e ka ni vakasama. Kevaka sa dabe koto na vakasama me bulibuli-ka mai na vakanananu ca, sa na qai cakacakataki na veika e gaganotaki, ni sa vakatuburi ka vakabutari oti ena vakasama.

Ia na vakasama e na cakacaka ga ena ka e soli yani kina. Kevaka e vakamatautaka e dua me vakaraica voli ga na ka ni garogaro ca e na ka e talanoataki se saravi, sa na yaco me lewe tiko ni nona vakasama na veika vakaoya. Sa na vakatuburi cake tiko ena veigauna kece e curuma kina e dua na ka vakaoya.

Ni sota kaya e dua na gauna ni tiko taurua (chance), sa cakacaka ga na ka sa vakabutari oti ena vakasama.

E ka rerevaki na ka e vakasamataki. Ke sega ni qarauni se yadravi, ena yaco me murisese ka lako vakaveitalia ka laki vakayacori kina e vuqa nai tovo lolovira, dukadukali, veivakalolomataki ka rerevaki.

Oqo na vuna e kaya kina na Turaga ko Jisu ena Maciu 5:27-28: “Dou rogoca sa kainaki vei ira e liu, mo kakua ni dauyalewa, ia, o au, au sa kaya vei kemudou, okoya yadua ena raica na yalewa me dodomo kina, sa dauyalewa oti e lomana.”

Nai valavalaca ni vakasama e ka rerevaki, ka ni sa ivurevure ni ca lelevu ka ra yaco tiko ena keda maliwa ena gauna oqo.

Kevaka e vakabulai ka vakasavasavataki na loma ni tamata, ena savasava talega na vakasama ka na sega ni vagolei ki na vakanananu dukadukali ka dau yaco kina na itovo lolovira ka vakarerevaki.

Ni tubu cake na veimataqali leqa ni veiyacovi e Viti kei vuravura ena gauna oqo, sa vakaraitaka vakamatata na noda sa gole tani mai na inaki savasava ni Kalou me baleta na yagoda ka da sa totogitaki keda tikoga vakataki keda ena levu ni lewenivanua era biu ki valeniveivesu ena veiyabaki.

Sa noqu i vakasala me da na maroroya na i solisoli talei ni Kalou esa solia mai vei keda yadudua na nona i bulibuli talei.