Na toso ni gauna

ENA macawa oqo e levu sara na i talanoa keitou vakarautaka yani mo ni wilika na noda ko ni dau taleitaka ka vakamuria mai na noda niusiveva oqo.

Na i talanoa ni nona siko mai na daunivakasala ni matanitu o Isireli ki na Pasifika o Yaron Dadon ka levu sara na i tukutuku e veivakadeitaki kina.

E a vakaraitaka ena nona vosa ena Ratu Sukuna Park na turaga oqo ni o keda e Viti e da sa sega qai yali tiko ena nodra vaqarai tiko na yavusa era a yali voli, ia eda sa wili me dua na yavusa ka sa kunei ka tiko na noda i sema ki na matanitu oqo o Isireli.

Dina ni via 100 vakacaca na lewenivanua era a tayabe ena Vakaraubuka sa oti, ia e ra marautaka tu na tayabe oya na kena tokoni ena masu na matanitu o Isireli.

E mai marautaki talega ena i ka 14 ni siga ni vula o Me na yabaki 70 ni nona tu vakataki koya o Isireli.

Ena macawa talega qo e laurai ni sa tokitaka na nona valenivolavola ni mata na matanitu o Amerika mai Tel Aviv ka me sa toki ki Jeruisalemi.

Dina ni levu tiko na veicoqacoqa ena vuku ni tuvatuva e sa biuta oqo na i liuliu ni matanitu o Amerika, ia na toso ki Jeruisalemi e sa toso ga.

E na macawa talega oqo e dua na i talanoa mai Bua, oya na nona mai tiko voli e Bua e dua na luve ni lota mai Igiladi.

Kevaka ko sa vodo waqa oti mo takosova na vanua e bulu toka kina na luve ni lota oqo, ko na rogoca ni ra na vakatagi sici ena nodra vakarokoroko na tiko ena loma ni waqa oqo ena vuku ni nona sa mai bulu koto mai Bua na turaga vutuniyau oqo.

E dua talega na neitou i talanoa e baleta tiko na nodrau veiwekani o Bua kei na vanua o Toga e Rewa.

Oqo na i talanoa ni kena vakau na kai mai Toga ki Beqa ena vuku ni nodrau veiwekani e dua na ravouvou ni Toga kei na marama mai Bua.

E na gauna oqo se vakadinadinataki tikoga na vanua oqo, na uciwai ka laki sovaraki kina na kai ni Toga ni se tu vinaka sara tu ga kina na kai me yacova mai na gauna oqo.

E levu na i talanoa se na i tukuni ka veisemati vinaka kina na noda veiwekani na i Taukei ka dua oqo na i sema ni veiwekani e da dau vakabibitaka na kawa i Taukei.

Ni da vakavinakataka na noda i sema ni veiwekani, e dau kauta mai na bula ni veilomani kei na veikauwaitaki, ka tiko talega kina na bula ni veirokorokovi.

Eso talega na i tukutuku ka veitalanoataki ena loma ni Palimedi, ko ni sa bulagoci kina na noda, ka tiko talega eso na i tukutuku ka i vaqa vakayalo e sa vakarautaki tu vei kemuni na noda ko ni dau wilika na noda niusiveva oqo.

E nuitaki ni ko ni na marautaka talega na i tukutuku ni qito kei na i tukutuku ni veivakatoroicaketaki ka veivuke tu ena noda bula ena veisiga kei na yalava ni veiqaravi e da sa vakaitavitaki keda kina.

Esa nuitaki ni na dua na macawa vuavuai vinaka na macawa oqo.