Na revurevu ni veisau

EDA sa vavaca tale tu oqo na sereki ni oti na i matai ni wasewase ni vuli. E sa mai cava na nodra qito na luveda era dau nanamaki kina ena vuku ni sotasota ni Coca- Cola Games.

Esa mai vakacavari na qito oqo ka rau mai taura na ulu ni covi na koronivuli e rua mai Ratu Kadavulevu School kei na Adi Cakobau School vei ira na goneyalewa.

E da rogoca talega na i tukutuku ena nodrau mai leqa e lewe rua na cauravou ni rau mai vakarautaka ga na medrau uburu, ka mai kau tani sara kina na nodrau bula.

E da rogoca talega mai vei iratou na Tabacakacaka ni Ovisa ena kena vaqaqai tiko e dua na kisi ni veivaqaseni ka qai tabaki tu ena ‘social media.’

Ena vuravura kei na gauna eda sa donumaka tu edaidai, e sa totolo sara na vakau ni tukutuku ena mona livaliva kei na talevoni veikauyaki. Na kena vakayagataki vakavuku kei na kena vakayagataki vakayalomatua e sa tiko saraga ena qeteqete ni ligada.

Eda raica talega ni dau vakayagataki na buturara oqo me caka kina na veibuturaki sobu se na kena veikauyaki eso na i yaloyalo e tawakilikili.

Oqori eso na veisau eda sa raica tu ena noda Viti kei na veiyasai vuravura ka sa sega ni rawa ni da na vakuwai keda mai ena veisau ni gauna eda sa donumaka tu ena gauna nikua.

Na kena bibi na nodra vakavulici vakavinaka na noda i solisoli, e na i tovo kei na i vakarau ni bula, esa rui ka bibi.

Esa cakava tiko na lotu, na matanitu kei na vanua na nona i tavi.

Vakacava e sa tekivu tiko mai vale na nodra tuberi ka vakasalataki na vuvale ena sala dodonu me ra na muria?

E sa ka bibi na noda qarauna vakavinaka na veika me da mai vakaitovotaki keda kina.

Ena macawa oqo e na tekivutaki talega kina bose ni wasewase ni Lotu Wesele e Viti kei Rotuma.

Kena i karua na kena vakayacori e levu na vuli ena veitabana ni cakacaka eso.

Na macawa oqo e sa tekivu kina na bose ni yasana o Tailevu ka vakayacori tiko mai Nauluvatu, Nakelo.

E na macawa oqo, eda sa vakanamata kina na lewei Viti ki na qito le yavitu ka vakayacori mai Singapore.

Eda sa vakanuinui tu ni ratou na rawata mai na qaqa na noda toanivala ena nodratou sasaga me ratou na liu ena poidi.

Ena gauna oqo e se karua tikoga ena i tuvatuva ni poidi ni HSBC World Rugby Sevens Series na noda timi.

E sa vakanuinui talega na Nai Lalakai ni ra na maroroi vakavinaka na luveda ena vakacagicagi macawa rua oqo ni bera ni tekivutaki yani na ikarua ni wasewase ni vuli.

Me tuvani vakavinaka e dua na i tuvatuva vei ira na luveda ni ra tiko e vale ena gauna ni sereki oqo ka me ra vakasalataki tiko ena veigauna kece.

Ena macawa oqo e sa lesu talega mai na noda i liuliu ni matanitu ena bose ni CHOGM ka vakayacori mai Lodoni.

Era sa laki sikovi talega na lewenivanua o ira na noda era tiko mai Bolatagane ka vakaraitaki talega na i tuvatuva esa koto ena vuku ni veidigidigi ena loma ni yabaki oqo.

Latest posts

More Stories