Na papitaiso nei Joni

Update: 12:09PM Oqo na i kuri ni nona i vakamacala o Talatala Qase vakacegu, Pauliasi Vatanitawake ena i tukutuku ni papitaiso.

Ni wiliwili sara yani.

Sa tekivu donu na nona veivakasavasavataki ko Joni, baleta ni sa levu na i valavala sa basika mai na nodra i soqosoqo na lotu vaka Jiu me vaka na vakabauta vaka Farisi.

Na i tokani i Setoki ka vuqa tale ka so era se qaravi matakau tu ga.

Ka sa dodonu kina me ra sa toburaki ena wai ka me ra vakatusa na nodra i valavala ca ni ra sa veivutuni ka papitaiso ena papitaiso nei Joni, me vaka ni se qai kena i sevu oqo ni dua na veivakavoui me vakayacori k me sa tauyavu kina na vakabauta ni matanitu ni Kalou.

Sa volai ena i vola nei Aisea na kena parofisaitaki mai kina ena liu mai ko koya me mai caramaka na sala i Jiova me mai vakadodonutaki kina kei na nodra vakavoui kina. ko ira mera lewe ni matanitu vakalomalagi.

Sa i tavi talega nei Joni me caramaka na sala nei Jisu na Mesaia.

Ka so talega era lako ga mai me ra mai vakadikeva na ka sa cakava tiko ko Joni.

Ia ko Joni e sa kilai ira ka kaya vei ira. Ko cei sa vakasalataki kemudou mo dou dro tani mai na cudru ni Kalou Maciu 3:7

Ena dua na siga sa basika ko Jisu ka gadreva me sa papitaiso talega vei Joni.

E a kidroa ko Joni ka kaya vei Jisu ni sa sega sara ni rawa me papitaisotaki Jisu.

Sa rawa ga vei Jisu me papitaisotaki Joni baleta na papitaiso nei Joni, sa baleti ira na i valavala ca.

Ia ko Jisu e sega na nona i valavala ca.

Ia sa kaya ga ko Jisu ka vakayacora ga, ni sa dodonu me papitaisotaki ko Jisu ena nona i tutu vaka Mesaia kei na nona sa vakarau laki mate ki na kauveilatai.