Na noqu biliraki: Serevi

Ko Waisale Serevi kei na nona vuvale. Veitaba: VAKARAUTAKI

ENA nona dei ka valataka na veika e vakabauta ni na vukea na kena laveti na rakavi lewe ya vitu e Viti, a mani vakaukauwataki me vakacegui mai na nona i tutu vakadauniveivakatavulici ni rakavi lewe ya vitu mai vei iratou na vakalesilesi ni valenivolavola ni rakavi unioni ni noda vanua. (FRU ena gauna oya ena ruku ni veiliutaki nei Keni Dakuidreketi).

E talanoataki taucoko na veika oqo ena nona i vola vou e yacana ‘Waisale Serevi- the King of Sevens ka vola o Nic Darveniza ka taba mai na Bay Area Publishing.

Ni oti na nona dauniveivakatavulici ena timi ni Viti ka rawata mai kina nai matai ni kena rawati na qaqa ena World Rugby Sevens Series ena 2005/06, a mani kacivi tale me la’ki veituberi tale me yacova ni sa roro tiko mai na Qito Levu ni Vuravura ena 2009.

E dua na vakatulewa dredre vei Serevi, ka ni sa tawase rua tu na nona vakatulewa ena vuku ni nona i tavi vou (Dauniveivakatavulici ni timi ni Taiwan) kei na nona sa ciqoma na kaci ni vanua. Ia, a mani vakaliuca ga o koya na kaci ni vanua mai na nona itavi.Ni oti e dua na gauna taucoko ni qito, a mani lesu tale mai o Serevi, me vaka e tukuna nai vola.

Na vanua cecere a sa bau yacova o Serevi ena i tutu vaka daunivakatavulici, dauqito talega mai na 2005 kina 2007 esa tekivu me lutu, e kaya nai vola.

Ena nona lesu tale mai me mai taura tale na dauniveivakatavulici, a yacova o Viti na fainala mai Dubai kei Sauca Aferika ia a druka ruarua vei Niu Siladi.

Vakatakilakila ni leqa
Ena nodra cegu na dauqito lewe ni timi ena macawa ni Siga ni sucu, a ciqoma o Serevi e dua na veisureti mena vakaitavi ena sotasota ni rakavi lewe ya vitu mai Ositerelia na Darwin Hottest Sevens tournament ena Janueri kei nai kumukumu taledi yani e Viti.

Ena gauna a daramaka kina na nona i vava ni qito, na i lakolako qo i Ositerelia e vunitaki toka kina e dua na i tuvatuva. O ira na nona i tokani dauqito era sotava na dredre ena nodra vakavakarau kina sotasota ni Wellington Sevens ena vula tarava.

Ia, ena nona lesu mai ki Viti, e kidacalataka o Serevi ni qai mai kila ka ratou sega ni bau vakaraitaka mada vua, na i lawalawa vakailesilesi era sa digitaka oti tu na timi me na la’ki qito ki Wellington. Na kena ca, ni sa mani veivosakitaki oti tu me na vakatarogi ena retio yaloyalo ena vuku ni kena veitalanoataki na kacivaki ni yaca.

Oqo saraga nai tekitekivu ni dua na delana levu e sotava ena nona dauniveivakatavulici ena vuku ni kena sega ni rogoci na veika e laveta cake mai vei ira na tiko ena vale kau vulavula ena gauna oya.

E vola nai vola, ena nona gauna taucoko ni qito e dau qarauna sara o Serevi me kakua ni vakayalolailaitaka e dua ena kena rogoci na nona itukutuku.

Siga ni rarawa
Oya ena gauna ni vakaukauwa yago ena mataka tarava, eso na lawalawa mai na vakalesilesi ni FRU e liu esa mai soli vei Serevi nai vola ni nona vakacegu.

E kidroa o Serevi, ena vuku ni veika esa mai yaco vua qo. A mani sainitaka nai vola o Serevi, a vakavinavinakata o koya na FRU ena vuku ni nona a vukei Viti ka mani siro sobu yani ena kabakaba ka la’ki vakamoce vei iratou na cauravou dauqito. Na wigi ni Okaladi, Iliesa Tanivula esa wawa toka, tu vakarau me veisosomitaki ena dauniveivakatavulici.

A lululu vei koya o Serevi ka vosa ni vakanuinuivinakataki koya ni bera ni qai lesu tale ki vei ratou na timi.

A kacivi ratou tale na lewe ni timi o Serevi ka mani vakaraitaka vei iratou na tukutuku. E tuturu na wainimatadratou na cauravou, ka mani vakayaloqaqataki ratou.

Na nona biubiu o Serevi mai an timi ni oti e 21 na yabaki ni nona veiqaravi esa rui dredre dina, na mosi kei na cola i tavi ena vuku n qito rakavi lewe ya vitu

Na nona i vola esa volitaki tiko ena sitoa nei Tappoo ena veiyasai Viti.