Na nodra dinata na nodra Siga Tabu

OQO na i kuri, ka ai otioti talega ni i kuri ni tukutuku ni totogi e tau e na yasana o Bua ena kena sega ni dau rokovi na Siga Tabu.

OQO na i kuri, ka ai otioti talega ni i kuri ni tukutuku ni totogi e tau e na yasana o Bua ena kena sega ni dau rokovi na Siga Tabu.

Ni tei wilika sara yani.

Kuria o Matawalu ni ra kaya na nodratou qase, ni so vei ira na kai vesu, e ra sega tale ni qai vakayakavi e na wawale ni yagodra, ka ni gauna ga e cegu kina na nodra vakatotogitaki, e ra sa moce tokaga e na vanua e ra teitei tu kina, ka ra qai yabeni koya ga mai na vo ni kaivesu, e na nodra sa lesu tale ki na nodra keba.

Ia, e na vei mataka lailai ga ni se bera ni tagi na soqe, e vaka me sa kidava tu na nodra sala ni dra kei na nave ni veitiki ni yagodra, ni gauna oya e dodonu me ra sa yadra kina.

Tomana o Matawalu ni ra sa dau duri galugalu ga mai vakamalua, ka so vei ira era dau mamakeukeu lo toka, ka ra gole cuvacuva yani ki bati ni wai, ka mai veitauriliga tu yani, ka waraka na i vakaro e ratou na solia mai na nodra ovisa.

?O ira na ovisa e ra veitotogitaki tiko e na gauna oya, era rogoca ga na vosa nei Ratu Jone Matawalu, ka ra sega ni via kauwaitaka ke o gone lailai sara, se tinani gone bukete, se tukani gone, se buinigone sara, ni se bera ga ni tagi na soqe, e sa dodonu mo duri tu e na bati ni uciwai,? e kaya.

Kuria o Matawalu ni sa qai vaka tu oya na parokaramu ni nodra dau totogitaki na kai vesu e na veisiga.

Tomana ni vanua e tuvai kina na vatu oya, e nodra koro makawa ka rauta toka ni 500 na i kalawa, me tekivu mai bati ni wai, ka kauta cake sara ki na nodra valenilotu.

E kaya ni ra dau talanoataka na qase ni Kavula ni, dau dua dina na ka vakaloloma kevaka era mai totogitaki tu e dua na matavuvale, me tekivu mai vei tama, tina, ka kauta sobu vei ira na gone.

Vuqa na gauna e dau tuturu ga na wai ni matadra na marama, ka ra sega ni cakava rawa e dua na ka, baleta na i vakaro e sa vakatauca oti o Ratu Jone, e sa kilai tu vakamatata e na veikorokoro e Bua raraba.

Sa kena i balebale, ni dodonu mera sa muria mada ga, baleta ni o koya ga e beca, e rau sa na sota vata kei na kena i samu ni dawa.

?Na lawa cava e da qai mai bulia tu e na gauna oqo?

?Na lawa era a se bulia mai na tukai keimami e na gauna oya,? e kaya.

E kaya o Matawalu ni kaukauwa ni nodra dinata ka vakabauta na Kalou, e vakayacori gona kina e so na lawa ka da sa mai vakaweleweletaka tiko na kawa tamata eda bula tiko e na gauna oqo.

Tomana o Matawalu ni dua na gauna vakaloloma dina na gauna me sa mai vakacavara kina e dua na turaga, se dua na marama, se dua na veitamani, se veibuni na nodra i totogi.

Na yakavi ni siga oya e ra sa na qai dau solevu kina na kaivesu, me ratou cakava na mataqali o Nawaisavu e dua na magiti ni veitalatala vei ira na sa vakacavara na nodra i totogi, ka dau levu na gauna e tuturu ga na wai ni matadra na sa vakarau biubiu, baleta ni dua na veimosoti levu e ra sa mai vau vata tu kina e na gauna ni nodra totogitaki.

Kaya o Matawalu ni siga e tarava e ra sa na qai vakarautaka na ovisa ni kaivesu na kena kakana, kei na mena yaqona, me nona i kaukau lesu, ka ra sa na qai taubale taki koya na ovisa me yaco sara ki nodratou koro.

?O cei e kaya ni qai mai caka wale tikoga oqo na ?Yellow Ribbon??

?Keitou na koro e na loma ni colo kei Bua oqo e se caka sara mai vei keitou e na gauna oya,? kaya o Matawalu.

Na nodra veivakasukai na ovisa oqo me yacova sara ni sa la?ki soli na kaivesu ki vei ligai turaga ni koro, ka vakadreti talega vei ira, me ra talanoataka e na gauna ni nodra bose vakoro, na veika dredre era a sotava mai Kavula.

Toamana o Matawalu, na i naki ni nodra dau talanoataka na kaivesu na veika rarawa e ra sotava mai Kavula, sa i koya me ra vuli kina na lewe ni koro, ka ra tugadra deivaki e na nodra vakanananu, me ra kua kina ni talaidredre e na lawa ni Siga Tabu. Kuria ni dau kena i vosavosa tu e na koro ko Kavula, ni dua e dau mai totogitaki, sa dua la na ka na kaukauwa ni yalona, ni se qai yaco yani; ia, ni sa cakacaka taka oti na nona i totogi, e na tautauvata sara ga e dua na yalo ni ruve na malumalumu ni yalona, ka mudu vakadua na voravora e kauta voli yani e na i matai ni gauna.

?Na gauna e sa mai volekata kina na i tuvatuva vatu na neimami valenilotu mai na bati ni uciwai na Nai, e a qai takosova na vanua o Bua raraba e dua na qaravi tevoro vakaiyanaqa, ka vakavuna me sa yala koso sara ga e kea na i tuvatuva vatu ka dau vakananumi kina o ira na dau vakaweleweletaka na Siga Tabu, baleta nira sa vakayagataka tale na neimami qase me biu e na dela ni nodra i bulubulu na lewe ni koro ko Kavula,? kaya o Matawalu.

Kuria ni e na i ka 4 ni siga ni vei vula kece ko Jiune, e na veiyabaki, e ra na dau laki lotu kece na lewe ni koro ko Kavula e na i tuvatuva vatu ka tiko e na nodra koro makawa, me rawa ni ra dau vakananumi ira kina na wekadra, ka ra a totogitaki tu e na gauna koya, ka vakakina vei ira na lewe ni yasana o Bua raraba, ka ra a sega ni qai taubale rawa lesu tale ki na nodra koro ni sa oti na gauna era cakacakataka kina na kedra i totogi.

Tomana ni gauna oqo eratou sa Talatala tiko kina ni Lotu Wesele e vica na turaga ni Kavula me vakataki: Talatala Josateki Vula, Talatala Eparama Raraumala, Talatala Tevita Bolatini, ia, e sa mai kacivi toka na nodrau bula o Talatala Ilaitia Qalomai kei Talatala Meli Uluitoga.

E mai tinia toka ga ena nona i talanoa o Matawalu, ni kaukauwa ni nodra maroroya na noda Kalou levu ko Jiova na lewe ni yasana o Bua raraba e na gauna koya, e vakavuna me so vei ira na kaivesu era sa la?ki kacikaci no ni cagi e na bati ni uciwai batabata na Nai.