Na mate veitauvi

Update: 10:55AM ESA kacivaka na Tabana ni Bula na kena tete tiko na mate ka vakatokai na meningitis ka rawa ni vakavu leqa kevaka eda sega ni qaqarauni kina na lewenivanua.

E rauta ni 100 vakacaca na kisi e laurai ena 2016 ka ra sa leqa kina e 14 na pasede vei ira na tauvi ira na mate oqo.

 E da sa vakasalataki na lewenivanua me da na qaqarauni ena tikina oqo, ka me da kua ni vakaweleweletaka na i vakasala eratou dau kacivaka.

 Kevak o kila ni sa tiko vei iko e dua na Iivakatakilakila ni mate oqo, e na daumaka mo na laki siko ena dua na valeniwai se na valenibula ko voleka kina ka me ra na qaravi iko na vuniwai kei na nasi ena kena sagai me vakawabokotaki na mate oqo.

 Na mate talega na deqi eratou sa vosa tiko kina vakabibi na Tabana ni Bula.

 E ka bibi na noda qarauna na noda bula, na tiko savasava kei na kena vakayagataki na kakana bulabula ena veisiga.

 Me ra na qarauni vinaka talega o ira na luveda ena nodra tiko bulabula kei na nodra bula ena veisiga.

 E sa ka bibi vei keda na lewenivanua me da na qarauna tiko na noda bula.

 Esa dau vosa talega vakalevu na Tabana ni Bula ena vuku ni mate sureti ka levu sara na i Taukei kei ira na lewenivanua duikaikai esa mai kacivi na nodra bula ena kena sega ni qarauni na bula kei na tiko bulabula.

 Na noda bula vinaka e sa tiko saraga ena qeteqete ni ligada.

 Na noda kania na kakana e bulabula ka vinaka ena yagoda esa vakatautaki ena kakana eda digitaka me da kania ena veisiga.

 Esa vakamamasu na noda tutuna oqo, ni da na tovolea me da na kania na kakana mai na were.

 Na vuata, na kakana draudrau kei na kakana dina e dau kilai tani kina na noda vanua.

 Na kena saqa bulabula na ika, se na rourou, na ota, ka tavu na kumala kei na uto, era kana vinaka ka bulabula ki na yagoda.

 Esa kena gauna oqo me da sa lesu tale ka vakabulabulataka na vakasaqa kei na cakacaka ni kakana era dau kilai tani kina na noda qase ena gauna e liu.

 Meda segata ka veitauriligataka vata na kena tarai cake na noda koro, na Iitikotiko me dua na vanua vinaka, ka me da turaga, marama yago bulabula vinaka.

 Me da sa tekivutaka saraga mai vale na sasaga oqo, ka me rawa ni da na vorata kina na veimate vovou era sa veitauvi mai vakalevu vei keda na lewenivanua.

Meda tekivu madaga ena kakana eda kania ena veisiga me vaka na vakayakavi, se na vakasigalevu kei na katalau.

 Na kena teivaki na kakana draudrau me vaka na bele, na rourou kei na ota ena noda yasa ni vale.

 Kevaka e levu tu na qele ena nomu yasa ni tikotiko, e sa rawa saraga ni teivaki kina na kakana bulabula vakaoqo, ka maroroi na ilavo oya me baleta na veika yaga tale eso.

 Eda sa vakauqeti na dauwilika na niusiveva oqo me da tutaka vata na kena tarai cake e dua na Viti vinaka ka me da lewenivanua bulabula ka tutaka na tiko savasava.