Na i tovo vakaiTaukei

ENA macawa oqo e mai noda i takitaki kina na nodra vuli e rauta ni 20 na turaga mai na yasana o Rewa kei Tailevu ena kena sagai meda sa kilai keda tale na kawa i Taukei kei na i tutu eda sucu vata kaya mai.

Vei ira na vuli ka sa tauri i vola oti oqo mai Nadave era sa digitaki mai ena nodra dui koro kei na nodra mataqali baleta ni ra kawa turaga ka ra sa vakavulici tiko ena i tovo ni veiqaravi kei na veika mera vakaivalavalataki ira kina ena i tutu ni veiliutaki.

E ra marautaka na veika era mai vulica na lewe 20 na turaga oqo ka rauta ni 16 na macawa na dede ni nodra vuli.

Ena tabana e 4 ni noda i tabe ena macawa oqo, e vakabibitaka tiko kina na Vunivola Tudei ni Tabacakacaka i Taukei o Naipote Katonitabua na veika e dau caka ni yaco e dua na i tovo ca ena dua na loma ni noda i tikotiko na kawa i Taukei.

A vakabibitaka tiko na Vunivola Tudei ni o keda na i Taukei eda dau vakamenemenei ena gauna ga eda sucu mai kina, se o yalewa se tagane, e tu na noda i valavala ni bula na kawa i Taukei e vakaraitaki kina ni da ka lomani ena noda loma ni vuvale, na mataqali kei na koro.

E vakaraitaka tiko na nona kauwai ena vuku ni rorogo e sa rogovaki tiko ena noda vanua, ena vuku ni basu lawa me vaka na kucu kei na nodra dau vakasaurarataki na marama kei ira na gone.

E sa dusia tiko ni sa luluqa tiko na i tovo eda dau kilai tani kina na kawa i Taukei.

E vica na i tuvatuva lelevu e vakaraitaki ena veika e dau vakayacori ni da sa via vakawatitaka e dua na marama, oya me vakayacori na veitalanoa ka ra laki duguci mai na marama.

Vei ira na i solisoli, na veika e dau caka kei na magiti e dau vakayacori ni sa sucu e dua na gone kei na nodra sa laki yacova na i taba ni bula ni goneyalewa na luveda yalewa kei na veika e dau caka ena nodra kana i bure na cauravou.

Ni vakayacori na veika oqo ena noda veivuvale, e na kauta mai na vinaka kei na yalo ni veidokai ena loma ni noda i tikotiko.

E laurai kina ni ka vakamareqeti na bula ni dua na tamata, tabu yani ka sega ni da mai vakayagataki tu me da i vakarau ni ka.

E sa ka bibi me da na veitalanoa tale mada ena vuku ni veika e sa yaco tiko ena noda vanua, na noda i tikotiko kei na noda koro.

E sebera ni da bera.

E da rawa ni cakava e dua na ka, e ka bibi ga na noda veitalanoataka na leqa e sa tiko kei na veika e rawa ni vakayacori me na veisautaki kina na keda i rogorogo.

E na macawa oqo, e sa i cavacava ni macawa ni bera ni ra na vakacagicagi yani na gonevuli ena loma ni rua na macawa mai oqo.

E sa koto na vakanuinui ni ra na marautaka na luveda na nodra vakacagicagi ka meda vakayagataka talega na gauna oya me da na veitalanoa kina kei ira na noda lewe ni vuvale.