Na draki veisau e Navakasiga

TEKIVU sara ga mai na gauna ni Koloni, keimami sa dau kerea tiko me tara na neimami bai ni uwa, mai vei ira na veimatanitu era sa sivi yani, me yacova mai na gauna oqo.

Na veibose kece ni Tikina keitou sa oca ga na cokataka tiko yani kina me bau dua na neitou bai ni uwa, e qai dau kena i sau tiko mai ni sa kau cake na neitou mosoni.

Me na kau cake tiko beka me na la’ki yaco ki vei! Ki Delai Navakasiga beka?

Oqori na nona vakatataro o Marika Bola naba 1, e dua na turaga ni koro ko Naivaka, e na Tikina ko Navakasiga, e na yasana ko Bua, ka talanoa tiko ki na Na i Lalakai, mai na nodratou loma ni koro e na macawa sa oti.

E kaya o Bola ni sa totolo sara tiko na tubu ni wai e na nodratou koro, e na vuku ni veisau ni draki eda sotava tiko e na gauna oqo.

O ya na vuna era sa tokitaki kina ki na delana e na yasa ni neitou koro, me la’ki tara kina na nodra veivale, e na vuku ni veisau ni draki eda sotava tiko e na gauna oqo.

“Yacova sara ga mai na nodaru veitalanoa tiko oqo, e sa tokitaki oti e 19 na vale ki na neitou koro vou, ka ra a dau tu ga mai bati ni wai e liu.

“Au vakabauta kevaka me caka vakavinaka e dua na neitou bai ni uwa, ke sega tiko na tokitoki vakaoqo,” kaya o Bola.

Tomana na turaga yabaki 65 oqo ni nodratou koro ko Naivaka, e dua na koro rairai totoka e na gauna e liu, ka ni tuvani vakamatau na veivale, ia, kevaka me a rogoci na nodra kerekere e na tara ni nodra bai ni uwa, e na sega sara ga ni tokitaki na nodra veivale.

Kuria ni nodratou matasawa e na gauna e liu e dau nodra i sakisaki na Tikina ko Navakasiga, ka ni nodra i kelekele na waqa lelevu e na kena titobu vinaka, ka sega ni gadrevi kina e dua tale na wavu.

Ia, na veisau ni daki eda sa sotava tiko e na gauna oqo, e sa mamati mai kina vakatotolo na nodratou matasawa, ka ra rivarivabitaka tiko na lewe ni koro, kevaka e na sega ni caka e dua na bai ni uwa, e na dua na gauna lekaleka walega oqo, era sa na tokitaki kece na veivale ki na delana e cake.

Tomana ni ra sa vakila tiko na lewe ni koro ni vaka e toso cake tikoga na uwagunu e na veisiga, ka na rawa ga ni tarovi kevaka e vakayacori kina e dua na ka.

“Au sa vakamamasu sara ga ki na matanitu e veiliutaki tiko e na gauna oqo, ke rawa ni bau nanuma mai na neitou koro ko Naivaka, me rawa ni ra tiko vinaka kina na i sausau vou e na veisiga ni mataka,” kaya o Bola.