Na cakacaka ni kaulotu

Update: 11:15AM ESA na mai cava tiko ena macawa oqo na i talanoa ni nona kaulotu ki na colo kei Solomoni o Nai Talatala Apisai Nawai, mai na soqosoqo lotu na Assemblies of God ka tekivu kaulotu ena loma ni vanua mai Solomoni ena 2012.

Ena yabaki sa oti, vakaraitaka na turaga ni Nasukamai, Nalawa ena yasana o Ra ni sa vakanananu voli mai Viti ka sa yacovi koya e dua na kusima vakaitamera.

�Baleta ni keimami kakana ena veisiga, na kumala kei na wai, ka so na gauna esa na madra tale tiko na kania na kakana vakaoqori.

�Ena dua na mataka lailai, au sa gadreva saraga me�u sa kana ika, ka�u vakananuma toka ga.

�Au kidacala ni sa gole mai na i tukutuku ni sa kau tiko mai e dua na kequ ika.

Esa tukuna mai  e dua na cauravou e keya ena vosa vaka Pidgin.

�Pasto, keikei belong you.�

E via tukuna tiko mai na cauravou oqo ni kequ ika na kaikai e sa tu oya, me laki kauta mai.

Ni dolava madaga o Nai Talatala na i oloolo kakana oqo, e sa kovu tu mai vakavinaka e dua na kena tuna.

�Esa dua na ka na noqu marau, kau qai vakasamataka ni noda vakanananu e kila na noda Kalou,� e vakaraitaka o Nai Talatala Apisai.

Na nanuma ni lomada, na noda tu cake kei na noda dabe sobu e kila vinaka tu na noda Kalou. 

Tukuna ni vakila ni voleka vua na Kalou ena veisiga, dina ni ratou tu mai Viti o iratou na nona veitinani, ka toso vinaka tiko na nodrau vuli na nona cauravou.

�Au sa marautaka dina na veiqaravi ena vanua e vakarautaka oqo vei au na Kalou, au sa vakila tiko na kena vinaka kei iratou na noqu veitinani.�

E tomana o Talatala Apisai ni qarava na cakacaka ni kaulotu, me levu ga na noda loloma kei na cakacaka vakaukauwa.

Meda matanataka saraga na lotu eda tukuna tiko, kei na Kalou vakacava eda qarava.

Esa vakadinadinataka tiko o Nai Talatala na veika e teivaka tiko ena vuku ni nodra vuli na lewe 71 na gonevuli ena Alafe Primary School.

E dua ga na nona i tatau vei keda e Viti, me da dau nanumi ira na wekada era dau kauta tu na i tukutuku vinaka nei Jisu, ka veivuke ena veimasulaki ka meda tokona na cakacaka ni kena vakatetei na itukutuku vinaka kei  Jisu vei ira era sebera ni rogoca ka kila na i tukutuku vinaka.

Esa vakavinavinakataki vakalevu na nona solia na nona gauna kei na nona mai wasea na nona i talanoa o Talatala Apisai ki na noda niusiveva oqo na Nai Lalakai.