Musuka na kawakawa o Keni

Sa veiwaseyaka tiko oqori o Etuate Naqora na i sulu e na nodratou loma ni valevakoro mai Nasolo, Ba e na macawa sa oti. Veitaba: REINAL CHAND

NA GAUNA oqo e sa qai kakamusumusu sara ga vakavinaka na neimami i kawakawa ka toka tikiva ga na neitou koro o Burelevu, ka sa vakadredretaka sara ga na neimami veitosoyaki.

E vakadeitaka mai na i tukutuku oqori ki na Na i Lalakai, ko Vilikisa Nagalu e dua na turaga mai na koro ko Burelevu e na yasana o Ra.

E kaya ko Nagalu ni se bau vo toka vakalailai na nodratou i kawakawa ni oti na cagilaba o Winston, ia, na nona qai ravuravu yani o Keni e na macawa sa oti, e sa qai vurumemea sara ga na simede, ka ra kakalovelove na kaukamea e na kaukauwa ni kui ni wai.

Tomana na turaga oqo ni gauna e la’ki caka yani kina na nodratou i kawakawa e sega ni caka sara vakavinaka ka ni donumaka ga e dua na kui kaukauwa ni wai, e sa na baci kabasu tale.

“O ira na veikorokoro era tiko mai na tai ni uciwai kadua o Namara, Nasavu, Nailuva, Nasaumakia, Nauria, Nasau, Vanuakula kei ira na i tikotiko vagalala, e sa dredre sara ga na nodra veilakoyaki.

“Era saumi keria mai nodra dui koro, yaco mai matasawa, vakaleleci mai na nodra kako kei ira na tamata e na i bilibili, ra qai mai saumi keria tale ki na tai ni wai e nakoro.

“Sa ra wini ga na vaka keria, e na tubu ni sau ni vodovodo,” kaya o Nagalu.

Kuria ni yacova mai na nona qiri tiko mai enanoa, se kabasu vakavinaka sara tu ga na nodratou kawakawa, ka se bera ni dua na tabana ni gaunisala e la’ki sikova yani.

Sa kerekere raraba sara tikoga o Nagalu ki na noda matanitu ka veiliutaki tiko e na gauna oqo, me ratou yalovinaka sara, ke rawa ni vakavinakataki, ni bera ni qai dua na vakacalaka levu e yaco.