Mera nanumi na turaga

Update: 8:42AM E VAKARAITAKA ko Ilaisa Raisele e dua na turaga mai Delaitoga ni gadreva na matanitu me liutaki keda ni oti na veidigidigi me matanitu e rawa ni maroroya na noda qele.

Au vinakata sara ga e dua na matanitu ena rawa ni na maroroya na noda qele na kawa i taukei kei na noda lotu, e kaya o Raisele.

Me na matanitu e maroroya na noda qele.

E tomana na turaga yabaki 67 qo ni tikina o Matailobau ni vinakata talega na matanitu ena veiliutaki ni oti na veidigidigi me na kauwaitaka na noda veiwekani vakamata tamata.

Oya saraga na vuni noqu a yadra vakamataka nikua (Vukelulu sa oti) meu vakarautaki au rawa ni bera ni ra yadra na lewe ni neitou koro, e kaya o Raisele.

Na turaga qo o Raisele e sega ni rawa ni lako vakayawa e na vuku ni tauvimate e tauvi koya ka sa dau vakayagataka tiko nai lakolako kau me rawa ni vakauti koya voli ena vanua e via lako kina.

Me vaka ni yawa sara mai na koro na vanua au mai veidigidigi kina qo au a vakayagataka ga mai na noqu ose me vakarawarawataka na noqu mai biuta na noqu digidigi e na koronivuli qo e Vunidawa, e kaya o Raisele.

Na turaga qo o Raisele e a taubaletaka e 200 na mita me rawa ni laki sili kina tobu ni wai volekata na nona vale ka ni sa maca tiko na wai e na nona koro o Delaitoga.

Au nuitaka ena noqu digidigi qo ni na rawa ni basika na matanitu e maroroya na neimami turaga na kawa i taukei ka kauwaitaka na kena vakadeitaki tikoga ni keimami taukei ni qele, e kaya o Raisele.