Mera bau rogoci

E TAVUSOYA tiko na loma ni yasana o Nadroga kei Navosa ena gauna oqo na kena sa vinakati me sa veisautaki na koronivuli ni yasana na Nadroga/Navosa High School me sa Technical College se me sa koronivuli vuli cakacaka.

E TAVUSOYA tiko na loma ni yasana o Nadroga kei Navosa ena gauna oqo na kena sa vinakati me sa veisautaki na koronivuli ni yasana na Nadroga/Navosa High School me sa Technical College se me sa koronivuli vuli cakacaka.

Sa vakaraitaka raraba na jeameni ni Matabose ni yasana o Nadroga/Navosa o Ratu Wakanimolikula Vosailagi ni a sa duavata tu na yasana mai na matai ni siga ni veiqaravi ni matanitu na nona veitokoni ki na veika e gadreva.

Oqori ena vuku ni saga ni Minisitiri ni Vuli mai vei Dr. Mahendra Reddy e na kena gadrevi me vakaduri e dua na koronivuli ni vuli cakacaka ena loma ni yasana me vakatokai na Technical College.

Me vaka ni dabe toka talega e na loma ni yasana na Cuvu College, e taroga kina e dua na vuli oti e na koronivuli ni yasana oqo na cava e sega ni bau veisau ga na i matai ni yacana mai na Cuvu me sa Technical me vaka ni sa tiko rawa.

Na koronivuli na Nadorga/ Navosa High School e sega walega ni koronivuli, e dabe vata toka na kena i tukutuku ka rabailevu sara.

Era a vuli kina e levu sara na yaca rogo e na noda vanua e na gauna a se yacana tu kina na Cuvu Mission.

E vakawakana ni sa yavutaki no e na veika vakayalo ka qai dabe no yani kina me sa koronivuli ni yasana me vakataucokotaki na vuku vakayalo ki na vuku vakavuli me taucoko kina na rawa-ka e na dela ni vuku yalomatua.

E matata vinaka kevaka era sa na vaqara koronivuli tani e sa na sega ni salavata e na yavu e vakavuvulitaki e na koronivuli ni yasana oqo e na vuku ni veitataunaki ki Lagi e na veimataka ni bera ni tekivutaki na vuli e na dua na siga.

Dua e a vuli e na Mission na Radi ni noda Pereditedi vakacegu o Adi Lady Bale Ganilau ka matata vinaka tu na vanua cerere e yacova.

E matata vinaka tu na i tukutuku ni koronivuli oqo vei ira na vuli oti kei ira na lewe ni yasana.

Dina ni sa vakaraitaka na yasana na nona vakatulewa, ia, e a bau rogoci li na domodra na lewe ni yasana?

E vakabauti ni lewa oqori e ratou sa bosea vata ga na lewe ni matabose ni yasana ka sega o ira nai tubutubu kei ira na vuli oti.

Na nodra dau gole na gonevuli ki na veikoronivuli sekedri e dau salavata kei na i tatau mai vei ira na i tubutubu mera vuli sara vakaukauwa ka ra rawata na nodra vuli e na kena i veta sara e cake.

Sa i koya oqo e dua na tikina era gadreva tiko kina na i tubutubu kei ira na vuli oti mera veitalanoa kei koya na Miniista ni Vuli kevaka era kauwaitaki dina na i tubutubu ni koronivuli na Nadroga/ Navosa High School.

E vakaraitaka talega na tikina oqori e dua na lewe ni To ni veisaqa o Viliame Gavoka vua na Minisita ni vuli o Reddy me yalovinaka ka sotavi ira na 240 na i tubutubu era a sainitaka na kudru oqori.

Sa dodonu me kila deivaki tiko o Reddy kei na matabose ni yasana ni tiko na nodra dodonu me vaka e yavutaki e na vakavulewa mera vakaraitaka na nodra nanuma ki vua na minisita.

Era kauwai sara kina vakalevu na i tubutubu e na vuku ni vakanananu era a biuta koto mai e na vuku ni nodra veisiga nimataka na dui luvedra.

Ka me kua ni raici tiko ga na ka era sa vakatulewataka rawa tu ka sega ni rogoci na domodra na ogataka na nodra vuli-ka na dui luvedra.

Sa dodonu ga me rogoci mada na yasana ruarua ni veitalanoa na i tubutubu, vuli oti kei na matanitu.