Me duru bukawaqa, ka duru O

E LULUVU ka cavuta na nona vosa ni veivakalougatataki o Suliana Delai, ena nona vakaitavi ena kena vakasoburi na duru ni valenisoqo vou ni valenilotu o Nabua ena siga Tusiti.

O Delai e sa yabaki 79 ka se gole mai ki na koro o Nabua ena 1953, ni vo tale e 11 na yabaki me qai tara na valenilotu levu oqo, ka valenilotu liu ni Wasewase o Nabua ena loma ni Lotu Wesele.

E marama ni Bureta, mai Ovalau ka dua vei ira na marama, era a raica na kena tauyavutaki na lotu e na Tabacakacaka oqo o Nabua.

E tubu cake mai, ka sa yalomatuataka ka raica na veiveisau kei na vua ni lotu ena loma ni valenilotu oqo.

E liu keimami se dau laki lotu ena dua na valenilotu veitikivi kei na baqe na Westpac, ka se keimami vale vaka-Viti tu ga, se sega na gaunisala.

Ena gauna oya, au se yalomatuataka ga na nona Talatala vei keimami o Talatala Mikaele Dreu, e talanoataka o Delai.

Me duru bukawaqataka ena bogi, ka duru o ena siga, ka me vakacerecerei tikoga na yacai Jiova, oqo na veika e cavuta na marama oqo ka luluvu ena gauna e sa sova kina na simede ni duru ni valenisoqo ni lotu oqo mai Nabua.

Na nona i tokani, o Salote Colati, yabaki 78 e cavutu talega mai Mudu, Koro e Lomaiviti, e kaya ni marautaka ka dua na siga lagilagi ni raica na vua ni lotu ena nodra cakacakataka na lewe ni lotu me dua na nodra valenisoqo.

E kaya na i vakatawa ni valenilotu, o Taniela Naocotabua ni rauta ni $40,000 na i sau ni tara ni valenisoqo oqo, ka ra sa kumuna rawa e $37,000 na i vavakoso e na loma ni rua na yabaki sa oti.

Na i lavo oqo era solevutaka ga na lewe ni vavakoso, ka rauta ni 724 na lewena, ka keimami kumuni i yau ga ena ono na wasewase keimami wili tu kina.

Oqo talega na neimami tuvatuva ni kena vakananumi na yabaki 50 ni Jupili ni lotu Wesele e Viti, ka i vakananumi talega ni yabaki 50 e mai tara kina na valenilotu e Nabua, e kaya.

Na i lavo era kumuna rawa oqo e i sau ni yaya ni valenisoqo ni lotu, ka ra na solia ga na nodra gauna kei na bula na turaga na lewe ni vavakoso na kena tara na valenisoqo oqo.

Keimami dau vakayagataka tu ga na vakatunuloa, ia oqo e sa na tara e dua na olo vinaka me caka kina na soqo, na vuli se na bose se soqo ni lotu, e kaya o Naocotabua.

E vakaraitaka o Nai Talatala Qase ni wasewase, o Waisale Ketedromo ni i vakaraitaki ni nodra lomana na cakacaka ni Kalou na i vavakoso, oya na nodra solia na nodrai yau me tara kina e dua na valenisoqo ka sa mai vakavotukana tu ena macawa oqo.

E namaki me na vakacavari ena mua ni yabaki qo, na olo vou ni Tabacakacaka o Nabua.

Latest posts

More Stories