Me da veitalanoa mada vakalevu:Samisoni

E VAKARAITAKA ki na Palimedi o Mere Samisoni mai na i To ni Veisaqa ni dodonu me dau vakayacori vakawasoma na veitalanoa e na Bose Lawa.

E tukuna na veika oqori ni oti na nona vosa bubuluitaki e na siga Vukelulu ni macawa sa oti.

E a sosomitaki Ratu Sela Nanovo e na i To ni Veisaqa o Mere Samisoni , e na nona sa mai leqa e na yabaki sa oti.

A taroga o Samisoni ki na Palimedi se cava esa sega ni vakayacori tiko kina ka me tekivu saraga ena loma ni Bose Lawa na vakasama ni talanoa ka dau vunautaka vakavuqa ena bose levu ni COP23 mai Bonn e Jamani na noda matanitu ena gauna a vakayacori kina na bose oqo ena mua ni yabaki sa oti.

E taroga talega o Samisoni ki vua na Sipika ni Palimedi se cava e sa vagalalataki kina na parokaramu ko ya ki na loma ni Vale ni Bose.

Kuria ni kevaka me caka na talanoa e na loma ni Bose Lawa, e na vakarawarawataka sara ga na nodra gagadre na lewe ni vanua se na noda vanua lomani o Viti ena kena gadrevi na sala ni veitaratara kei ira na Minisita.

?Kevaka e vinakata na noda Paraiminisita me tokona na vakatutu ka a tutaka tiko mai, e dodonu me vakayacori na talanoa e na loma ni Bose Lawa me vaka na kena kau ki Bonn mai Jamani.

E kuria o Samisoni ni na yaga sara vakalevu me vakayacori na talanoa e na Bose Lawa me rawa ni wali kina na Tabana ni Suka, Tabana ni Bula kei na veika matailalai tale e so.

?Au vakatututaka sara ga vakaukauwa me vakayacori na talanoa vaka oqo e na noda veitikotiko kei na vale ni Bose Lawa me rawa ni veitalanoataki kina e vuqa na ulutaga bibi me vaka na benu ca e na noda veisaqata,? kaya o Samisoni.