Maue na koro o Manu

Update: 8:33AM E DUA na ka na levu ni nodra marau na lewe ni koro e Manu e na vuku ni kena sa mai vakavotukanataki na sasaga ni bula torocake e na loma ni nodra koro e na macawa sa oti. E a mai dolavi e lima na ka lelevu e ratou sa mai vakaitavi kina na Tabana ni Bula ni noda vanua, na Valenivolavola ni yasana o Tailevu, koronivuli ni vuli nasi e Tamavua kei na Sejmal Investment.

E mai veivuke na kabani na Sejmal Investment e kena tara na taqe ni wai ka dau tavulona na wai ni gunu me rawa ni savasava ka tautauvata ga na wai tawai tavaya mai Yaqara ka kena i sevu e a mai caka e Manu.

E vakaraitaka ko Jonacani Draunaturaga na liuliu ni koro e Manu e na nodra marautaka na lewe ni koro na veika esa mai caka oti ena kena tara na vale lailai sova wai, na paipo ni wai ni gunu ka lako vata kei na kena taqe me vakasavasavataka kei na valeniwai esa mai dolavi rawa.

Na nodra vakavinavinaka levu na lewenivanua e Manu ena dua na gauna balavu esa qai mai rawa tale ni bau caka na paipo ni medra wai ni gunu me vakadroidroi kina nodra veivalevale.

E vakaraitaka ko Josaia Baba na dairekita ni kabani na Sejmal Investment ni sa i tuvatuva ga ni Kalou me na mai cakava na paipo e na koro o Manu ka sega ni vakacalaka.

Au marautaka ni rawa ni digitaki au na Kalou meu mai cakava ena yabaki qo na paipo ni wainigunu ena koro qo o Manu,e kaya o Baba.

E vakaraitaka na turaga ni Yadrana qo ni sega ni vakacalaka na nona sa mai veimaliwai e na loma ni koro qo o Manu ka taleitaak sara na nodra veikauwaitaki na lewenivanua e na gauna lekaleka e mai veiqaravi tiko e na kena tara na paipo ni wainigunu.

Era a marautaka na lewenivanua kei ira na vulu nasi ka tiki tiko ni nodra veiqaravi e na taudaku ni koro levu na koronivuli ni vuli nasi e Tamavua me ra dau mai cakacaka se vuli tara na vuli nasi e na i otioti ni yabaki ni nodra vuli ni bera ni ra qai tara na nodra i vola ni cakacaka me ra veilesiyaki e Viti.