Marautaki na qaqa

ESA mai qaqa o Ratu Kadavulevu School vei ira na tagane ena sotasota ni ni qito ni Coke Games ni oti e 21 na yabaki, ka taqomaka tale o Adi Cakobau School nai covi vei ira na goneyalewa.

E rawata e 12 na koula, 9 na siliva kei na 8 na varasa o RKS, a mai karua na koronivuli ni cauravou mai Kaunikuila (Marist Brothers High School) ena 10 na koula, 5 na siliva kei na 13 na varasa ka ratou katolu na Natabua High School ena 9 na koula, 5 na siliva kei na 5 na varasa.

A ka lima na Suva Grammar School ena 5 na koula, 5 na siliva kei na 6 na varasa, ka tarava sara o Queen Victoria School ena 4 na koula, 10 na siliva kei na 1 na varasa.

A qaqa o Adi Cakobau vei ira na goneyalewa ena 19 na koula, 12 na siliva kei na 9 na varasa, tarava o Jasper Williams ena 11 na koula, 13 na siliva kei na 6 na varasa ka katolu o Saint Joseph’s Secondary School ena 5 na koula, 5 na siliva kei na 8 na varasa.

A ka va o Suva Grammar School ena 3 na koula, 3 na siliva kei na 2 na varasa.

A mai ciqoma na i covi ni dauqito gugumatua vei ira na goneyalewa ko Heleina Young mai na St Joseph’s Secondary School ka nona vei ira na gonetagane gumatua ena qito ko ko Petero Veitaqomaki mai na Marist Brothers High School.

E vakaraitaka ko Walesi Soqoiwasa na vukevuke ni qasenivuli liu mai RKS, ena nodratou mai druka vei Natabua ena yabaki sa oti, e ratou nuitaka ni na nodratou na qaqa ena yabaki qo.

A qaqa taucoko ena wasewase ni yabaki ena sotasota ni Coke Zero Deans ena sotasota ni rakavi o RKS ena yabaki sa oti, ia ena yabaki qo e rawata na i covi ni Cokes.

E vakaraitaka ko Antonia Raboiliku na dauniveivakatavulici ni koronivuli o Adi Cakobau ni ratou a solia na nodratou vakanuinui vinaka ni qaqa vei rau e rua na petereni ni dauqito ni ACS ka rau sa mai takali ena tekivu ni yabaki qo.

Na fainala ni 4×400 na mita
E rawata na koula na Jasper Williams High School ena wasewase na ‘Sub Junior Girls 4x400m relay’, siliva o ACS ka ratou varasa na Namosi Secondary School.

A rawata na koula o Suva Grammar School ena ‘Sub Junior Boys 4x400m’ kei na ‘Senior Girls 4x400m’.

A qaqa o ACS ena ‘4x400m’ka rawata na ‘Junior kei na ‘Girls Intermediate grades’.

A rawata na koula o Queen Victoria School ena ‘Junior Boys 4x400m’, rawata o Suva Grammar School na siliva ka varasa o RKS.

A koula o Ratu Kadavulevu School ena ‘Intermediate’ kei na ‘Senior Boys 4x400m relay’.

Na fainala ni 4×100 na mita:
A koula na Adi Cakobau School ena wasewase ni goneyalewa taucoko ena cicivaki kuila ena fainala ni ‘4x100m relay’.
A rawata na koula o Ratu Kadavulevu ena wasewase na ‘senior ena 4×100 na mita, siliva o QVS ka rawata na varasa o Marist Brothers High School.

Ena ‘Intermediate 4×100 na mita a qaqa o Natabua High School tarava o QVS ka varasa o Marist Brothers High School. Ena wsewasea na ‘Juniors’ a koula o Natabua, siliva o QVS ka varasa o RKS.

A mai rawata talega e rua na koula ko Camari Adi Lasaqa mai na Wainibuka Secondary School, e dua vei rau na koula e rawata ena nona cici ena 3000 na mita kei na kena i karua ena 1500 na mita.