NA GAUNA au se vesu tiko kina e valeniveivesu mai Naboro, sa dua na ka na noqu gadreva tiko me’u viritaka laivi na vatu ni butako, ia, e qai sega tiko ni rawa, baleta ni gauna ga au sere mai kina, au baci la’ki butako tale.
So na gauna, au sa dau vakasamataka ni rairai au sucu beka ga mai, me’u dua na dau butako.
Oqori na veika e cauraka mai e na Na i Lalakai o Tomasi Vosalevu e dua na turaga mai na koro ko Deladamanu, e na yasana o Naitasiri.
E kaya o Vosalevu ni butako e cakava tiko e tu sara ga e na kena i vakatagedegede duadua e cake, ka sega ni rerevaki ira na ovisa se o cei ga e vakababa mai matana.
Tomana ni dua na siga e sa qai masulaka ki vua na Kalou Levu ko Jiova mai na vuniyalona mai loma, me solia mada vua e dua na i solisoli me rawa ni rawa i lavo kina, ka kena i karua me rawa ni vakabulai ira kina na tamata.
“Veisiga kece e bulia na Turaga, au dau masumasu tiko ga e na noqu loma ni rumu.
“Na gauna madaga me’u laki kotikoti kina se la’ki teitei, dua ga na gauna galala, au na masu lo ki vua na Kalou bula me yalovinaka sara me vakayacora na noqu gagadre,” kaya o Vosalevu.
Kuria o Vosalevu ni dua na mataka lailai nona lesu mai na sisili, sa raica sara e dua na tiki ni pepa lailai ni davo no e na mata ni katuba ni nona rumu.
E a taura cake, gole sara ki nona rumu, ka la’ki cega sara me wilika.
“Na gauna au sa raica kina, au qai kila ni volavola e na tikini pepa oya, e volai tiko e na vuti ni toa.
“Turaga, ke sa i koya beka oqo na isau ni noqu masu, au sa vakavinavinaka sara kina vakalevu vei kemuni.
“Au cuva sobu e na yasa ni noqu loga, ka’u vakavinavinakataka na tiki ni pepa e sa tu oya e mataqu,” kaya o Vosalevu.
Tomana ni tiki ni pepa o ya e volai koto kina e vica na veika me wakia vata me rawa ni dua kina na waiwai.
E kaya ni waiwai oya, e qai lumuta e na dua na tiki ni yagona ni se bera ni moce.
“Au sa mani kerea sara ki vua e dua na ovisa me kauta mada mai na veika e volai tiko e na tiki ni pepa.
“Me ka ni cava qo, mo mai gunuva mo mate kina? e taroga mai na ovisa.
“Sobo yalovinaka sara kauta madaga mai kerekere,” kaya o Vosalevu.
Kuria ni matai ni siga e lumuta kina e sega ni bau vakila e dua na ka.
Ia, na i karua ni siga, ni qai 4 na kaloko e na mataka lailai, sa vakila o koya ni vaka era sa cacaribariba kece mai na sala ni nona dra, ka sa mai yadra mama sara tu ga yani.
E kaya o Vosalevu ni qai ka 5 ni siga ka lako yani, e sa nona i vakayadra sara tikoga na waiwai e lumuca, e na 4 na kaloko e na veimataka kece.
Kuria ni gauna e sa lumuta tiko kina, era qai kacivi koya ga na kaivesu me mai gunuti se vakasigalevu, ka ni sega ni bau oca vakalailai e na gauna e cakacaka tiko kina.
Tomana ni volai tiko e na i vola o ya, ni kevaka e dua na turaga me sa lumuta, ena tabu ni rau veiyacovi se tiko vata kei na watina se nona i tau e na loma ni 21 na siga.
E kaya o Vosalevu na gauna oqo e sa sivia e 2000 vakacaca na turaga kei na cauravou, era sa la’ki vakayagataka oti na waiwai e volitaka tiko.
“Dua na veiwatini e nakoro ko Namuamua, erau sega tu ni vakaluveni e na loma ni 10 na yabaki.
“Na vula sara ga o Okotova e na yabaki sa oti, sa qai kerei au o tagane ke rawa ni’u vukei rau.
“Oti au sa qai tukuna vua me rau lumuta ruarua vakaveiwatini na waiwai, ka me rau vakayacora na tabu au sa vakamacalataka oti oqori e cake.
“Macawa sa oti sa dua na ka na nona mamarau o tagane, ka mai vakavinavinakataka vei au ni sa vula 7 tiko na nona lewe ni vale na vula oqo,” kaya o Vosalevu.
Dua na cauravou ka yacana o Senitiki Buiwai, mai na koro ko Namuamua, e Naitasiri e vakamacalataka ni se qai yabaki 16 sa lumuta na waiwai ka volitaka tiko o Vosalevu.
E kuria ni vakila sara ga na veisau ni yagona, ia, ni sa yacova mai oqo na i ka 30 ni yabaki ni nona bula, e se tautauvata tu ga na kaukauwa ni i vakarau ni nona cakacaka.
“Na noqu teitei sa qai kaukauwa cake tikoga, ka levu na veika au cakava, e na gauna au sa lumuca tale kina e na i karua ni gauna, ka’u vakatatabutaka na kena tabu.
“Dua na ka e kauta laivi vei keda na vucesa, ka da sega ni wawale e na gauna eda cakacaka tiko kina,” kaya o Senitiki.
Kuria ni sa nona i tatau ga e na gauna o vakarau lumuta kina, mo vakabauta, ka masulaka vua na Kalou ni na cakacaka e na loma ni 21 na siga.
E kaya o Vosalevu ni vinakata me volai na waiwai e volitaka tiko, baleta ni sega vakadua ni bau dua na turaga se cauravou e volia, me la’ki tukuna vua ni ka lasutaki na ka e volitaka tiko, era na la’ki vinakata tale me ra volia e 2 se 3 na tavaya.
Tinia ni mate kecega me vaka na varivari, na mate ni suka, mate ni uto, ena kauta laivi na waiwai e na gauna ko lumuta kina, ka na vakabulabulataka talega na yagomu.
E na vakatataro matailalai tale e so, me baleta na i sau ni dua na tavaya waiwai, kei na tiki ni yago cava me lumuci kina, ni qai veitaratara ga e na nona naba ni talevoni veikauyaki na: 8018578, me rawa ni vakacegui kina na nomuni gagadre.
Namaka na i talanoa ni nona kaivesu e na macawa mai oqo
