Mai Drevekai ki Nakauvadra

ESA koto oqo e ra nai kuri ni tukutuku nei Peni Tabua Tamanivalu na turaga ni Naloto ka veivakananumi tiko vei keda e na veimacawa, ni wiliwili sara yani.

Ena macawa sa oti e vakaraitaka ki na o Tabua ni sa mai oti na veidigidigi ia, sa vakaraitaka oti tale tu ga na Lawata ni Gauna ni na qaqa o Bainimarama ia, e na sega ni dede ena qai yaco na i naki ni bose ni Vu me na qai basika na ka e dodonu me basika me na liutaki keda yani kina.

Ia, sa matata vinaka tiko nai tosotoso qo me vaka sa parofisaitaki oti tu ia ena sega ni balavu sa na basika na ka dina ka nanamaki tiko kina na kawa i Taukei dina e Viti me na vakaraitaki.

Mo ni na qai sarava ka waraka na lewa ni Kalou bula me na lutuka na noda vanua.

E vakaraitaka o Tabua ni dua na qaqa ni vucu esa tukuni tiko ni na yaco me na basika mai e dua na tamata tabu yani me na mai veivuke ena kena vakamatatataki na i tosotoso eda sa mua tiko kina qo na kawa i Taukei ena vanua lomani qo o Viti.

E vaka koto oqo na qaqa ni parofisai esa tukuni tiko mai-

Okotova na vula niu sa na butuka,

Sa na basika mai o kabu ni vuravura,

Dua na i tukutuku sa qai vura,

Ni sa talai mai vakusakusa.

Na i tukutuku qo esa waraka tiko na noda vanua se sa i tukutuku cava me na mai wasei me tukuni vei keda, e kaya o Tabua.

Ia, sa matata tiko ni na kacabote na i yau bula e na noda dela ni vanua ka sa na veivuke yani vei keda na lewei Viti na basika ni kalougata qo me rawa ni vakaotia na noda vakabobulataki tu mai e na dua na gauna balavu sara e na vuku ni veiliutaki ka ra tuvana tu na vulagi me da mai vakabobulataki tu ga e na noda vanua dina ka solia vei keda na Kalou.

E tomana o Tabua ni sa laurai tale tikoga e na gauna qo e dua na wai ni gunu bulabula (mineral water) e na koro ko Nakorovou, Mataso e na yasana o Ra ka sa i tekitekivu ni kena ra basuka na kalougata e Viti me na waraka na dela ni gauna talei ka ra se dau rogorogoca tu ga na noda qase ni na nei Viti.

Me da na waraka tale mada na vula sa koto qo e matada sai koya na vula o Okotova e na basika kina e dua na ka vinaka se dua na ka e sega ni na vakabauti me na yaco ia esa i tuvatuva ga vaka Kalou, e kaya o Tabua.

E kuria e na nona italanoa o Tabua ni nona mai qaqa qo o Voreqe Bainimarama e sega ni mai yaco vakacalaka, esa i tuvatuva kecega ni Kalou me na vakadeitaki ga kina na dina ni Parofisai, ia me da na qai waraka na vula tarava se na cava tale esa na kauti keda kina na parofisai.

Au vakavinavinaka vei kemuni kece na vakaitavi e na veidigidigi levu sa mai cava o ni a mai vakaraitaka na nomuni vinakata mo ni na veiliutaki e Viti ia, sa mai basika na vua ni sasaga vinaka, e kaya o Tabua.

E tomana o Tabua vei keda na tiko e na veikorokoro sa dodonu mo ni sa na yalomatua e na gauna qo mo ni na ciqoma na veika esa tukuni tiko ni na yaco ia na Kalou na tamada talega e vakaraica vinaka tiko ka maroroya tiko na noda vanua.

E vakaraitaka o Tabua ni dua tale na qaqa ni vucu ni gauna se lawata ni gauna e vaka koto oqo- Moce lutu i loma ni vesikula

Sa yavavala mai na vanua

Me saini o Vatu ni uraura

Sa oti na gauna kei vuravura

Sa dolavi na noda gauna

Kabi ki na wavu na sede koula

Na manuwa levu taudua i na vuravura

Vulagi me ra vodo vakusakusa

Me soli na tikite vakadua

Sa vura tu na qase ulu vula

Au druka e na uma ni koula

E ravita na tutuna ruarua

Sa vuki saumaki ki dakuna

E tomana o Tabua o koya e yalomatua ena rawa ni kila na i balebale ni tukutuku oqo kei na kena dela ni gauna me na yaco kina.

E na kuretaki Viti na uneune ni veisau. Sa vakasuka e Viti o vuravura, ni kena vakacaberi na gauna oqo e na vakasuka o vuravura mai vei Viti.

E na qai liutaki Viti ga nai Taukei dina kei Viti, ka na qai basika na koula e ra binibini vakauma.

Na gauna oqo e na kida mai me vaka na mataka.

E na cabe mai na kena i Volasiga, ka na lutu na kena buto ka na qai cabe muria mai na Matanisiga, e kaya o Tabua.

E tomana o Tabua ni ra kaya na vuku, e dina ga ni dau lutu na buto ni bera ni kida na mataka. E na yaco na dui yaloyalo ni kawa bula kei Viti. Sa mani koto e dua nai vakaro vei ira na tamata lomalomarua, o ya ni ra na vakawabokotaki e vuravura.

E vakaraitaka eke o Tabua ni sega dina ni vinakati e na i lakolako vou qo na tamata e lomalomarua baleta e na tini e na dua na vanua esega ni tadra.

Nai lakolako qo me vaka sa vakanamata kina o Viti o vinakata se sega esa na yaco ga mai na nona lewa na Kalou bula me na vakatikori e Viti e na i ka va ni gauna qo na veiliutaki ka ra sa nanami kece tiko kina na na lewei vuravura.

Ena qai tomani tale yani.