Luvu oti vakava

E rau sa samaka tiko oqori na nodrau i yaya ni vale o Jovesa Raiseu kei Maiva Naqiri ni oti na waluvu ni nodratou koro o Nasolo, Ba e na macawa sa oti. Veitaba: REINAL CHAND

NA KENA mai caka vou na wavu e Ba, e vakavuna sara ga na kena suka lesu mai na wai, ka mai luvu kina na neitou koro kei Yalalevu.

Na veika oqori e cauraka mai ki na Na i Lalakai o Mosese Volavola na turaganikoro ko Nasolo e na yasana ko Ba.

E kaya o Volavola ni kena bulu na yasa ni wavu vou, ka sega ni vakadavori kina e dua na kalivati (culvert) me rawa ni cevu kina na wai ki na veidogodogo, e vakavuna kina na suka ni wai ka mai luvu kina na nodratou koro.

Tomana o Volavola ni qai 6 na kaloko e na mataka lailai ni Siga Tabu, na i ka 8 ni siga ni vula ga oqo, esa kaci wavoki tiko kina e na koro ko Nasolo, me ra sa tokitoki ki na nodratou koro vou e delana.

“Ni ra qai yadra mai na lewe ni koro ni se qai 7 na kaloko e na mataka ni siga ga oya, e sa luvu ca sara ga na loma ni neitou koro, ka sa bera talega na tokitoki.

“Era luvu kece na i yaya e loma ni vale, ka vakakina na veika kece e loma ni valenikuro,” kaya o Volavola.

Kuria na turaga yabaki 45 oqo ni vuna levu duadua sara ga na kena sega ni biu e dua na i cevu ni wai e na yasa ni wavu vou.

Tomana ni o ira na vanua era sega ni dau luvu e liu, era sa luvu e na gauna oqo, me vakataki Yalalevu ni ra se qai bau sotava vakadua e dua na uwaluvu vakadomobula.

E kaya o Volavola ni totolo ni tubu ni wai, e ra vukibera kece na lewe ni koro, ka sega ni dua na i yaya era vakabula rawa, ia, era sa drovaka ga na nodra bula me kakua ni dua e vakaleqai.

“Yacova mai na gauna daru veitalanoa tiko kina oqo, e sa luvu oti tale vaka 4 na neitou koro.

Matai e na i matai ni siga ni vula sa dromu, ka sa luvu oti tale vakatolu e na maliwa ni matai ni siga ni vula oqo, ka yacova mai na macawa sa oti.

“Sa noqu i vakasala ga vei ira na lewe ni koro, me ra samaka vakavinaka na nodra vale mai na koro mai ra, ka me keimami tiko mada ga e na neimami koro vou ka toka e delana, de qai veitauvi na mate e na i boi ni soso,” kaya o Volavola.

E vakavinavinaka talega o Volavola ni sa yaco tiko yani vakamalua na veivuke ni matanitu, ka vakakina vei ira na veisoqosoqo e na kakana, isulu ka vakakina na wai ni gunu.