Levu na katikati

Update: 11:06AM SA gadrevi sara tiko vakabibi vei ira na i tabagone e na Tikina o Macuata, me ra vakawati ka me ra vakatubu kawa ki na nodra tikina.

Na veitukutuku oqori era kerea yani na i liuliu ni yavusa e na tikina o ya, e na dua na nodra vuli ka a vakayacori mai Seaqaqa e na macawa sa oti, ka vakadeitaki kina ni dua na i binibini cauravou levu era se sega tikoga ni vakawati.

E kaya o Semi Kuru na Provincial Administrator (PA) e na Tikina o Macuata, ni sa dua dina na dredre levu era sa sotava tiko e na gauna oqo.

O ya ni vaka me ra vakawelewele tu ga na cauravou, ka sega ni lomadra tu na vakawati.

Tomana ni o ya e okati kina na koro ko Nabukadogo e na tikina o Macuata, na koro ko Nanivuda e na tikina ko Seaqaqa kei na koro ko Koronivuli e na tikina ko Sasa. 

E kaya o Kuru ni ra sa kauwai sara tiko vakalevu na qase ni vanua ki na tolu na koro oqo, e na nodra sega tiko ni vakaluveni na i tabagone, era tubucake tiko mai e na gauna oqo.

�De dua e baleta beka ni sa sega na goneyalewa, ni sa dua na ka na levu ni cauravou era tiko e na tolu na koro oqo.

�Sa kauwai tiko gona kina vakalevu na turaga PA kei ira na qase ni vanua, de na lakolako e sogoti tale na nodra koronivuli, e na vuku ni lailai ni gonevuli.

�Ia, e sa tuvalaka tiko oqo na neitou valenivolavola e dua na parokaramu me rawa ni vakayarayarataki ira na cauravou me ra vaqara kina na nodra sui ni sarisari,� kaya o Kuru.

Tomana ni vuli siga tolu ka vakayacori e na macawa sa oti e sa vakabibitaki tikoga kina na i ulutaga me baleta na vakaluveni.

Kuria o Kuru ni ka e rivarivabitaki tiko, oya ni kevaka e sa na sega na gone, sa na sogo tale na koronivuli, ka vakakina na valenibula ka ra vinakata tiko na lewe ni tikina.

E tomana na turaga PA ni dodonu me ra taura vakabibi, ka kakua ni vaqitoqitotaka na cauravou na veika e sa vakamacalataki tiko vei ira, ka me rawa ni tubu kina na nodra kawa e na gauna mai muri.

Sa nuitaka tiko o Kuru ni na rawa ni veivuke na lotu kei na vanua, e na nodra sagai me ra vakawatitaki na cauravou e na gauna oqo, me kakua kina ni cavuka na i sema era tekivuna mai na nodra qase.