Levu na itaukei era beitaki ena kucu

VAKARAITAKA o Marama ni Ovisa Daiana Taqiri ena dua na nodra lotu cokovata na marama e Macuata ena macawa sa oti ni levu duadua na i wiliwili ni turaga i Taukei era beitaki ena kucu, ka 90 na pasede vei ira oqori era sega tu ni cakacaka.

Ni wasea mai na fika o Marama ni Ovisa, e tukuna ni yabaki 2016 e laurai ni turaga e qase duadua me beitaki ena kucu oya e dua na turaga esa tiko na nona yabaki ni bula ena 79 kei na cauravou gone duadua e beitaki ena cala oqo e tiko na nona yabaki ni bula ena 10.

Vei ira na kucuvi, e qase duadua e sa yabaki 84, ka gone duadua na i solisoli lailai ka se qai vula tolu.

Ena nodratou vakadikeva na ripote oqo na Tabana ni Ovisa, e laurai ni levu vei ira era vakacalai tiko ena cala ni kucu e tiko na nodra yabaki ni bula mai na 45 ki na yabaki 55.

E kaya o Marama ni ovisa Taqiri ni mataqali tukutuku vakaoqo e dodonu mera sa na yadrava matua na nodra i tavi na i tubutubu kei na kena yadravi na vuvale ena veigauna.

E kaya ni dodonu me na yadrava tiko o ira na i tubutubu na vanua era gade se tiko kina na luvedra ena veigauna kece.

E dodonu talega vei ira na i tubutubu me ra na kila vakavinaka o cei era vakailawalawa kina o ira na luvedra.

E vakadeitaka o Marama ni ovisa Taqiri ni ka bibi kina kawa i Taukei me na raica lesuva na i tovo kei na i vakarau ni bula eda kilai tani kina, baleta ni sa luluqa sara tiko yani na i tovo dina ni veirokorokovi eda dau kilai tani kina.

E vakaraitaka ni dodonu me da na raica lesuva talega na i vakarau ni noda veirokorokovi, oya na veivugoni, o cei eda veitabuki kina kei na veiwekani raraba eda sa kila tiko na i Taukei ena noda veikoro kei na veiyasana.

Latest posts

More Stories