Levu e na keba era tokoni Bainimarama

Update: 8:43AM E LAURAI ni lewe levu na lewe ni mataivalu era taleitaki sara tiko na veiliutaki nei Voreqe Bainimarama, na i liuliu ni soqosoqo vakapolitiki na Fiji First e na kena vakacagau tiko na wiliki ni digidigi vakabibi e na veivanua ka a vakayacori taumada kina na veidigidigi.

Ena RFMF Echo Coy mai Lautoka, e rawata o Bainimarama e 45 na digidigi mai na lewe 74 era veidigidigi ka 19 na digidigi e gole vei Joeli Cawaki.

Ena vanua ni veidigidigi mai na RFMF Delta Coy e Nadi, mai na 57 na digidigi e vakayacori, e 37 na digidigi e gole vei Bainimarama, 13 vei Samuela Vunivalu, kei na tolu vei Ruveni Nadalo.

Ia, e na vale ni mataivalu mai Labasa e na 56 na digidigi e 23 e gole vei Bainimarama, 28 vei Inia Seruiratu ka 2 na digidigi e gole vei Timoci Natuva.

Ena bareki ni mataivalu e Delainabua e na tolu na vanua ni digidigi e levu e gole vei Bainimarama oya mai na 266 na digidigi e vakayacori e rauta ni 229 e gole vua nai liuliu ni Fiji First- 220 mai na 279 e na QEB A (na vanua ni veidigidigi naba 239-701) kei na 375 na digidigi mai na 452 na digidigi e vakayacori e na QEB B (vanua ni veidigidigi naba 239-801).

Ia, e na QEB A (veidigidigi naba 239-702), e karua ni ni wiliwili levu duadua e gole vei Timoci Natuva kei Netani Rika, kei Ro Teimumu Kepa, Pio Tikoduadua, Inia Seruiratu e ratou ya ono na digidigi. Ena QEB A (vanua ni veidigidigi naba 239-701) e a karua e na i wiliwili ni digidigi e gole vua ko Seruiratu ka va na digidigi e gole vei Ro Teimumu Kepa.

Ena FTG A (vanua ni veidigidigi naba 239-901, mai Nasinu e rauta ni 162 na digidigi e vakayacori ka 107 e gole vei Bainimarama ka 17 e gole vei Ro Teimumu Kepa. Ena FTG B (vanua ni veidigidigi naba 240-001) e vakayacori rawa e 171 na digidigi ka 119 e ra digitaki Bainimarama kei na 20 na digidigi e gole vua na Marama Rokotui Dreketi, Ro Teimumu Kepa.