Leqa na idini ni waqa volekati Ovalau

E vakaraitaka mai o John Tunidau na i luliu ni Maritime Safety Authority of Fiji, ni ra vueti vakavinaka kece sara na lewe 180 na pasidia ka ra vodo tiko e na MV Spirit of Altruism, e na i golegole mai Natovi ki Nabouwalu e na mataka ni Moniti.

E kaya o Tunidau ni a leqa na idini ni waqa e na nona a se qai biuti Natovi e na veimama ni 7 e na mataka lailai, ka qai mani vakavuna na kena ciri, ka la?ki takasa sara e na cakau ka yacana tiko na Cakau Davui, volekati Ovalau.

Tomana ni ratou a veitaratara na MSAF kei iratou na i taukei ni waqa na Patterson Brothers, ni oti na vakacalaka oya, ka sa gole tale yani na i karua ni nodratou waqa na Spirit of Harmony me ra vakaleletaki kina na pasidia mai na waqa ka sa kasa no.

E vakavinavinakataki iratou talega na i taukei ni waqa o Tunidau e na nodratou veivuke talega e na nodra vakaleleci na pasidia ki na Spirit o Harmony.

Kuria o Tunidau ni ratou tiko talega na mataivalu e wai (Fiji Navy) e na kena sagai me vagalalataki mai na waqa oya e na dela ni cakau.

Tinia o Tunidau ni dodonu me ra kakua ni dau taura vakamamada na i vakasala ni draki ca o ira na i taukei ni waqa lalai, ka sega ni dau tau na i vakaro oya vei ira na waqa lelevu, baleta ni tiko vei ira na idini levu, ia, e kalouca sara ni mai yaco na vakacalaka e na Moniti, ka dodonu me ra dau tu vakarau e na veigauna kece.