Lave rara o Naitasiri

A MAI qaqa na timi ni Naitasiri Highlanders vei Namosi ena kai veivolekati sara, 24 kei 23 ena sotasota ni Skipper Cup ka vakayacori ena Thomson Park e Navua.

E vakaraitaka ko Tui Edidoka na dauniveivakatavulici ni timi ni Namosi ni ratou sega ni muria nai tuvatuva na nona cauravou dauqito kei na nona soli na tikidua dromodromo vua e dua na nona dauqito ena veivasu e cake e dua talega na malumalumu levu.

E kaya ni ratou na la’ki vakavinakataka na nodratou malumalumu ena nodratou vakarautaka na sota kei Malolo.

Ena i matai ni veimama a liu tu na timi ni Namosi ena 17 kei 12. E vakaraitaka o Koli Sewabu na dauniveivakatavulici ni timi ni Naitasiri ni dua na tekitekivu vinaka vei ratou na nona cauravou ka ratou sasaga tiko me ratou na qaqa taucoko ena nodratou sota ena Skipper qo.