Lauqa kei na veidigidigi

SA tekvu me vakilai e na vuqa na yasana ena noda vanua na lauqa e tarai keda tiko oqo.

E sa tekivu me yavala na matanitu e na kena sa tekivu me usani na wai ki Kadavu kei na Yatu Lau ka ra vakila tiko na lauqa e sa tarai ira yani.

Era na vakila talega e loma ni vanua e na yaco talega mera na vakila na draki ni lauqa oqo.

Na draki mamaca oqo e dau vakavuna na leqa ni manumanu, leqa ni kakana teivaki, totolo na tete ni kama kei na matetaka ka dau salavata.

Sa dodonu me da qaqarauni e na kena vakasaqari vakavinaka na wai ni gunu ka qarauni vakavinaka talega na bula.

Levu vei ira mai yanuyanu vakabibi mai na Yatu Lau era na vakila sara vakalevu na leqa ni wai me vaka ni vuqa vei ira e sega soti ni levu na medra i vakaso ni wai.

Ia, ni sa mamaca ga, era sa vakararai tale ki na i lakolako makawa era sa dau vakayacora na nodra qase e na gauna ni lauqa mera na vakatotomuria mera rawata kina na bula.

Dau levu vei keda na dau vakararavi ki na sasalu ni uciwai e sa na vakila na kena na mamaca mai e so na tolo ni wai ka na vude mamaca na veika e tawa laurai mai botona.

E vakaraitaka toka e dua na lewe ni koro o Nawamagi nira sa vakila na veikoro me vakataki Mavua, Raiwaqa, Vunarewa, Jubairata, Toga, Tawatawadji, Naveyago, Hautabu kei ira na dau teitei wili kina eke o ira na wekada na Idia na dredre ni bula ena veisiga me vaka nira rawata neimami bula mai na qele.

Sa maca mai e levu na veitoevu kei na veiuciwai lalai, na vanua era dau vagunuvi ira kina na bulumakau kei na ose ka vaka tale ga kina na vanua e rawati tiko mai kina na sasalu ni uciwai me vaka na ura kei na maleya.

Oqo e dua na tikina e dodonu me na yadravi sara vakavinaka me rawa ni yalomatua na kena wali na leqa e dau sotavi e na mataqali draki vaka oqo.

Veidigidigi ni 2014  

Sa na vakacavari tiko e na macawa oqo na veidigidigi taumada  me vaka e vakayacori e na veiynauynau ciriyawa  e na noda vanua kei na loma ni vanua e Viti Levu kei Vanua Levu.

Levu sara na kudru e vakadinadinataki ni yaco ni so era sega ni veidigidigi mai cala ni misini ni reijisita ni veidigidigi ka vakatulewataka tiko na tamata.

Eso vei ira era a vakanamata ki na veidigidigi, e mositi ira baleta nira gadreva me rogoci na domodra.

Ia, oqo nira qai via vosa, sa tukuni vei ira sega ni dodonu mo vosa ni o a sega ni veidigidigi.

Vei ira eso e yanuyanu era rejisita mai na nodra koro, ia, e na gauna ni veidigidigi taumada e sa qai tukuni vei ira mera laki ki Viti Levu ka laki veidigidigi se ki loma ni vanua.

Na cava e vu ni leqa?

Dodonu me na vakamcala kina na Valenivola vola ni Veidigidigi e na tikina oqo.

Levu talega na vanua era a qai kidacala nira sa basika yani na vakailesilesi ni veidigidigi me sa vakayacori na veidigidigi taumada.

E liu e vaka e drodro na uciwai na kau ni tukutuku mai vua na Talai Veivuke ni Veiwasewase ki vua na District Officer (D.O). Mata ni Tikina  ka dewa sara yani vua na turaganikoro.

E muri na kena sala vakacakacaka ka vakadinadinataki kina e na kena rawarawa ka totolo.

Lewe levu era a nanamaki ga ki na i ka 17 ni Seviteba me vaka na kena a tukuni taumada ni na dua ga na siga.

Na tikina oqori era a tomasi kina e lewe vuqa, se e a mai suruta dina na vusi.

Ia, oqo e sa vakanamata tu na noda vanua ki na Vukelulu ni macawa mai oqo ni na vakayacori kina na veidigidigi levu ni oti e walu na yabaki.

Nanuma deivaki tiko ni nomuni toqa, e na vakatulewataka na i tosotoso ni noda vanua ena veisga nimataka.