Lagilagi o Viti

EDA sa marau tu na lewei Viti, vaka talega vei ira na wekada era vakaitikotiko mai valagi ena nona sa mai laveta na rara mai Vancouver na noda mata timi leyavitu na Fiji Airways Fiji 7s na bilo ni oti na sotasota oya ena siga Moniti.

Me vaka na kena i vakarau, ni levu vei keda na lewenivanua, e mai tu vakadua na cakacaka kei na veiqaravi ni sa qito tiko na noda mata timi ena fainala.

Eda vakavinavinaka ni sa toso tiko na sotasota ni HSBC World Rugby Sevens Series e sa laurai talega na nodratou sa matua sara na lewe ni timi ena I vakarau ni qito eratou vakayacora e na rara ni qito.

Na timi ni Viti, e se qai matai ni timi era vakaitavi tiko ena World Rugby  Sevens Series me qaqa vakarua ni oti oqo na i kaono ni wavoki ni sotasota.

E vakasakiti na nodratou qito na cauravou ni tekivu ga mai ena qito vakatobu, ka qai talave cake tale na nodratou qito ena siga Moniti ena gauna erau sota kina kei na timi ni Argentina ena kotafainala, na timi kaukauwa ni Sauca Aferika ena semifainala.

Eda kurabui ni rau mai sota vata tale kei Kenya ena fainala, ni oti na nodrau a qito vata mai ena qito vakatobu.

Eda sa vakanamata sara yani na lewenivanua kei na dauniveitokoni ki na i tuvatuva cava ena biuta vata na dauniveivakatavulici, o Gareth Baber ena sotasota ni Commonwealth Games kei na sotasota mai Hong Kong, ena mua ni vula oqo.

E na yabaki talega oqo era na vakanamata na veitimi lelevu ena vuku ni sotasota ni vuravura mai San Francisco, Amerika.

Eda sa vakanamata tu na lewei Viti ni ratou na qarava vinaka sara na nodratou i tavi na cauravou era na digitaki ena rua na sotasota oqori, ka vaka kina na vo ni sotasota ni HSBC World  Rugby Sevens Series.

E dua na i tukutuku e biu toka ena ivola mata ni dua na ka na nodratou vakavinavinaka na timi ni Kenya ena yalo ni veikauwaitaki vei iratou na timi ni Viti ni oti na fainala.

Eratou mai masu vata na timi ni Kenya kei na timi ni Viti ka laurai ena i taba oya ka saravi mai vei ira na milioni ena veiyasai vuravura na i vakarau ni yalo e tu vei iratou na timi lewe yavitu.

E da raica talega na nona marau na dauniveivakatavulici o Baber ni oti na sotasota oqo, ka vakavinavinakataka na nodratou yalo vata ka cakacaka vata na noda mata timi ka rawa kina na qaqa.

Eda raica ni sa dua na ka na veitokoni mai vei ira na noda ena sotasota oqo mai Vancouver, era dara mai na siqeleti ka volai kina na yaca ni noda vanua, ka dua na ka na nodra marau ena nodra laki sarava na nodratou vakaitavi na timi ni Viti ena sotasota ka sa kilai levu tiko ena gauna oqo na HSBC World Rugby Sevens Series.

Ena vuku ni qito mai Hong Kong, e da raica ni sega ni rawarawa na timi eratou tobu vata kei na noda mata timi, oya na timi ni Rusia, Niu Siladi kei na timi ni Samoa.

Me vaka eda kila vinaka ni dau niu ga kei madrai ni rau dau sota na timi ni Viti kei na timi ni Niusiladi.

Ia, ena gauna madaga oqo, eda marau ni sa nei Viti na qaqa ena sotasota mai Vancouver ka vakavinavinakataki na nodratou qito na noda toa ni vala.

Latest posts

More Stories