Ko Sowakula

Ko Pita Gus Sowakula na dauqito ni Chiefs ka sa wanonovi koya toka vakamalua ena gauna qo ko John McKee na dauniveivakatavulici ni timi ni rakavi tinikalima ni Viti. Veitaba: VAKARAUTAKI

E RUA na dauqito e rau sa vakaraitaki rau tiko ena buturara ni sotasota ni Super Rugby ena gauna qo ka sa wanonovi rau tiko ko John McKee na dauniveivakatavulici ni timi ni Fiji Airways Flying Fijians.

Ena nona tekivu vakamuri ira tiko na cauravou ni Viti ka ra qito tiko mai valagi, ena kena vakarautaki tiko na timi ni Viti ki na Qito ni Vuravura mai Japani ena 2019, e marau o McKee ena nona sarava toka na qito nei Pita Gus Sowakula ka qito tiko ena Chiefs kei Manasa Mataele na wigi ni Crusaders.

E tukuna o McKee ni rau cauravou kaukauwa na dauqito e rua ka sa vosa oti talega vei rau ka rau tukuna ni rau marautaka ke rau mai daramaka na siqeleti vulavula ni Viti.
O Sowakula, e a qito tu e liu ena basketball, a qito ena Chiefs ena sota kei Highlanders ena i ka 30 ni Maji.

A mai taura nai covi ni ‘promising player’ o Sowakula ena 2017 ena timi ni Taranaki.
E rua na yabaki na nona qitotaki Viti ena basketball ka rawata kina na siliva ena 2015 Pacific Games. O Mataele e sega walega ni wigi totolo, e tiko talega vua na kaukauwa me cicivaka vakabalavu na polo ena vanua e osooso.

E marautaka o McKee na qito vata kei na timi era vakaitavi tiko ena Six Nations, Sikoteladi kei Varanise ena Noveba qo.

E kuria o McKee ni na dua na vakavakarau vinaka me yacova yani na qito ni vuravura ena 2019 ka na vakayacori mai Japani. E rau na sota tiko o Varanise kei Viti mai Parisi ena i ka 24 ni Noveba.

Na timi ni Varanise e sa qaqa taucoko tiko ena nona sota oti vakaciwa kei Viti, ka qaqa ena 40 kei 15 ena nodrau sota mai Marseille ena va na yabaki sa oti.
Ena Jiune ena sota tiko kina o Viti kei Romania, sota kei Georgia, ka vaka kina kei Toga ena ANZ Stadium e Suva.