Kasere o Vatuvula kei Vatusolo

SA MAI yala toka na noda i talanoa e na gauna era sa tukia oti kina na kava ni vale na lewe ni koro ko Namara, ka ra mai losea sara yani e dua na medra yaqona e na nodra koro vou.

Ni tei wiliwili sara yani:

E kaya o Qasenivuli Vakacegu Epeli Rawaqa ni oti ga na nodra gunu yaqona, ra moce vakalailai, oti oya mai dua yani na kena vakasigalevu vinaka, ra sa qai mai tekivu tukia yani na lalaga ni vale, ka caka e vica na rumu, me rawa ni ra tawana na sa vakavuvale tiko, o ira na cauravou era na vaqiqi tu ga e na loma ni vale.

Tomana o Rawaqa ni oti vakavinaka sara tu ga na nodra vakalalagataka na vale, sa kacivaki tale tiko mai e na walesi me ra vakavakarau na yatu Yasawa kei na yatu Malolo, ni dua na cagilaba e sa baci vakanaulu tiko yani kina nodratou yasayasa.

“Isa Turaga na cala levu cava beka keimami cakava, me keimami sa mai vakatotogani tu kina vakaoqo.

“Keimami se qai drovaka mada ga mai qo na sisi ni qele mai Vatuvula kei Vatusolo, ia, keimami sa baci vakaroti tale tiko mai oqo e na cagilaba.

“Ni yalovinaka sara na i Taukei ni Lewa, me keimami bau lomani na nomuni tamata,” e kaya ko Rawaqa.

Tomana ni sa qai tukuna vei rau na nona veitinani, me rau yalovinaka sara me sa na vakaleleci rau ki na koro ko Yalobi, me rau la’ki vakaruru no e na dua na vale vinaka, baleta ni ra se tiko ga e na veikau, e na gauna o ya. Kuria ni rau sa marautaka sara vakalevu na i tukutuku o ya na nona veitinani, ia, era sa qai kerekere talega na vo ni marama, ke rawa ni ra gole talega ki Yalobi.

Tomana o Qasenivuli Vakacegu ni ra sa qai vakavodoki kece na tinanigone kei ira na gone lalai me ra sa vakau yani ki Yalobi, ka ra tiko mai na turaga kei ira na cauravou, me ra vakarumutaka tiko na vale levu, ka ra se qai vakaotia wale tikoga e na sigalevu o ya.

E kaya o Rawaqa ni dede ga vakalailai, sa vakaleleci ira sara na marama kei ira na gone lalai ki Yalobi, me ra la’ki vakaruru kina. Kuria ni gauna e qai gole kina me la’ki vakaleleca ira mai na i karua ni i usausa pasidia mai Naboro, sa vakila sara ga ni vaka e sa kaukauwa cake mai na cagilaba ka a kacivaki taumada tiko e na walesi. E na qai kuri tale yani