Ka kece e tu vei keda

NA coi ni ti keitou vakarautaka vei ira na neitou vulagi e na siga e dai, e vakayagataki sara ga na veika e tu e na noda vanua, bau yaco sara ki na ti draunimoli, kei na coboi.

E vakadeitaka mai na i tukutuku oqori ki na Na i Lalakai o Raijieli Sinu, mai na koro ko Vatani, Kaba, Tailevu.

E kaya o Sinu ni ra lewe 30 na ovisa kei na sotia mai na wasa Pasifika, era a nodratou vulagi yani na koro ko Vatani e na Vakarauwai sa oti, ka ra bulia sara ga na marama na i coi ni ti, ena veika sara ga e tu vei keda.

Tomana ni icoi ni ti era bulia, e okati kina na tavioka yaca, qai biu e loma na vudi, na tavioka pie, ka waki vata na papukeni.

Sa totoka dina ni ra sa tuvani tu e na dela ni teveli, ka da na nanuma cala tale ni keke jokiliti, e na kedra rairai totoka.

Era marautaka sara vakalevu na vulagi ki na koro ko Vatani na veimataqali icoi ni ti dina era dau vakayagataka na tukada e na gauna e liu, ka kena i karua ni ra vakayagataka na veleti drau ni niu me ra tawa kina na coi ni ti.

E sa qai kuria talega na kamica ni coi ni ti na nodratou vakatara toka e dua na matasere mai na koro ko Vatani, salavata na totoka ni draki, e na cagi batabata ni dela ni wai siliva ka mudre toka e na loma ni vakatunuloa e na siga o ya.

E kaya o Sinu ni ratou marautaka vakalevu na nodra yaco yani na nodra vulagi, ka nuitaka tiko ni na sega ni kena i otioti.

Na bula ni soqo mai na koro ko Vatani e na Vakarauwai, e toso kina na nodra tiko na vulagi, ka ra qai biubiu mai e na 3 na kaloko e na yakavi, ia, na nodra parokaramu ni veisiko e dodonu me tekivu ga na 9, ka ra lesu tale mai e na 1 na kaloko.