Gadrevi na veisiko

Update: 8:41AM E MARAUTAKA o Jagdish Chand na nona ni mai toqa na nona digidigi ni oti vinaka e walu na yabaki ni veiliutaki ka sega ni digitaki mai vei keda na lewenivanua.

O koya e dua vei ira na  na turaga ni Idia ka sa vakaitikotiko e Muainaweni ena loma ni 59 ni yabaki ni nona bula.

E a dua vei ira na dauteitei gumatua e Muainaweni me tekivu mai na vuaviri ena 1987, 2000 kei na kena e na yabaki 2006.

E kaya o koya ni nuitaka ni na rawa ni vakavatukana na nona digidigi me na duri e dua na matanitu vinaka me na dau kauwaitaki ira na dauteitei vakabibi e na loma ni vanua me vakataki Muainaweni.

Kaya o koya ni rawarawa sara na veidigidigi vua ena loma ni yabaki qo ka sega soti ni taura na gauna me waraka na lewenivanua ena laini.

Dua na nona gagadre levu o Chand vakabibi ena gauna qo ka ni da donuya tiko e dua na lauqa balavu ka gadreva sara vakalevu o ira na dauteitei e Muainaweni me ra bau vukei ena vuku ni drake mamaca e sotavi tiko.

E vakaraitaka talega o Chand ni dau yaco na gauna ni leqa tubu koso e sega sara ga ni dua na tabana ni matanitu e dau sikovi ira yani na dauteitei mai kea.

Ia, sa tiko na nona vakanuinui ni na oti na veidigidigi ena yabaki qo esa na yaco me dua na matanitu vinaka e na rawa ni veiliutaki ka digitaki mai vei keda na lewenivanua ka na rawa talega vua na minisita me veisiko yani vei ira mai Muainaweni.

Kaya o koya ena gauna qo e lomaleqataka sara tiko na levu ni katakata e tara tiko na noda vanua ka rawa talega ni vakamatea na nona manumanu me vaka na bulumakau.

Esa dau laki vakagunuwaitaki ira na nona manumanu o Chand e na uciwai na Rewa ka ni drodro tikiva tikoga na i tikotiko ni teitei o Muainaweni.

E kilai levu tu na vanua qo o Muainaweni ni nodra i tikotiko na dauteitei ena loma ni yasana o Naitasiri ka ra levu ga kina o ira na noda vasu oya na Idia.

E dabe tale tiko ga kina na kena koronivuli levu e na sekenari kei na paraimari ia e ra sotava sara tiko na dredre e na gauna qo ena vuku ni lauqa ka vakabera sara tiko na nodra teitei.