Gadreva na SODELPA na veitokani

E VAKARAITAKA na Social Democratic Liberal Party ni na cakacaka vakaveivolekati kei ira na i tabagone mera na vakarautaka e dua na i tuvatuva ena vuku ni veivakacakacakataki kei na veivakaukauwataki e na gauna sa na liutaka kina na matanitu.

E virikotori e na nodra i tuvatuva vakacakacaka ni veiqaravi ni na dikevi vakavinaka e so na cakacaka ka ganiti ira na i tabagone, ka na vakaduri tale na National Youth Service Scheme kei na National Youth Employment Centre ka sa sega ni veiqaravi tiko e na gauna oqo.

E na nona vosa tiko na mata ni tabagone ni SODELPA o Laisani Qaqanilawa e kaya kina ni na raici me na maroroi ka vakayagataki na nodra taledi kei na rawa-ka ni ni noda i tabagone e na veika vakavuli, qito, veiliutaki, vakatagi, droini kei na veia tale e so.

E na gadrevi na kena tokoni ka vakailavotaki na veiqaravi ni Matabose Raraba ni Tabagone ka vakabibitaki kina na matavuvale, ka vakaukauwataki na tabana oqo me na qaravi koya vakataki koya ka me i soqosoqo me dau matataki ira na i tabagone e Viti, e kaya.

E na gadrevi me na kau lesu talega mai ka vakaukauwataki talega na porokaramu ni tabagone me baleta na palimedi me rawa ni vukea na nodra rokova na veiqaravi ni bula galala.

Kena gadrevi e 25 na pasede na i tabagone e na palimedi, lewe ni matabose e so, matabose ni matanitu kabani taukeni vakamatanitu me sivia na 10 na yabaki.

Ratou sasaga kina vakaukauwa na SODELPA mera vueti cake nai tabagone mai na i tukutuku ni dua na Minisitas ni matanitu veiliutaki oqo ni rauta ni 30,000 na tawa cakacaka e na gauna oqo, e levu vei ira era i tabagone me vaka ka ra rejisita tu e na ruku ni Minisitiri ni Leiba.

E 12,000 vei ira oqo era sa rawa i vola mai na iunivesiti kei na vuli torocake tale eso.

Latest posts

More Stories