Ena bera na sota nei Joshua kei Wilder

ENA sega ni vakusakusataki na nodrau sota o Joshua kei Wilder

NA beleti ga sa vo tiko me na taukena o Joshua na beleti ni WBC, ka taukena tiko ena gauna qo ko Deontay Wilder.

A sega ni ciqoma o Wilder na dauveivacu ni Amerika me la?ki dabe ena yasa ni rigi mai Cardiff, ka a tukuna taumada o koya ni sega ni rawa vei Joshua me na rau veivacu. Ni oti na veivacu ena mua ni macawa sa oti, a vola ena mona livaliva (Tweeter) na dauveivacu yabaki 32 qo ni a butakoca na qaqa o Joshua ni bera ni qai qiriti Eddie Hearn na paromouta ni veivacu mai Lodoni me tara na talevoni ni a qiri tiko yani.

E tukuna o Barry Hearn na jeameni ka tekivuna talega na kena vakarautaki na veivacu nei Joshua e nanuma me sa na tekivu ena macawa qo na kena vakayacori na veitalanoa ena vuku ni nodrau sota kei Wilder, ia e tukuna o Bunce ni na sega ni vakayacori vakatotolo na veivacu.

E laurai ena vukui Wilder ni kevu sara nai rogorogo esa rawata voli mai ka sega ni se veitalanoa na dina ena otioti ni gauna a vakayacori kina na veivosaki.

E dodonu me na gole o Joshua ki Amerika

NI rawati na qaqa mai Amerika e dua na kalawa tarava nei Joshua kevaka me na muria na mawe ni yavadra na dauveivacu rogo era sa liu oti yani.

Esa tukuna oti o Hearn ni vanua vinaka me na vakayacori kina mai Las Vegas se ki New York, ia ena vakatau mai vei koya ena nona tiko na veitalanoa.

E vakaraitaka ena Sky Sports o Johusa ni sega ni taleitaka me na la?ki veivacu e Amerika, ka kuria ni daumaka me rau na mai veivacu e Lodoni se e Cardiff.

Ia, vei Costello, e kaya ni dodonu o Joshua me kua ni dokadokai koya ni ka Bolatagane ena nona a toso cake tiko kina dua tale na i vakatagedegede ni veivacu.

Kevaka e vinakata me na rogo levu e vuravura, ka me na dau nanumi me vakataki ira na veiyaca rogo ena veivacu era sa liu yani, e dodonu me na la?ki veivacu e Amerika.

E tukuna o Costello, ni o Bolatagane e liutaka tiko na vuravura ena buturara ni veivacu, ia ena vaka me yavalati koya tiko me tawa mudu, vakavo me na cakava kina e dua na ka.

Na cava e vulica o Joshua?

Ia, esa i ka 21 ni nona sega ni bau druka o Joshua ka se qai matai ni gauna me yacova kina nai ka 12 ni rauni ena nona veivacu voli mai ena nona a sota kei Parker. E tukuna o Joshua ni sa levu sara na veivacu esa vo tiko e matana, ni sa qai oti ga qo e lima na yabaki ni nona veivacu saumi.

E tukuna o Costello ni dau vakaukauwataki Joshua tiko na ligana i mawi ka vakavuna tiko na nona dauqaqa voli ena veivacu. Ia, ena rau veivacu tarava qo o Tyson Fury kei Parker.

E tukuna o Parker vei ira na daunivolaitukutuku, ni sega ni qai veivutuni ena nona a mai druka oya ka kuria ni na lesu tale mai me na veivacu tale ni oti na i matai ni nona mai druka qo.

Esa tukuna o koya ni vinakata me rau na veivacu tale kei Joshua ena dua na gauna totolo mai oqo.

Ia, e kaya na paromouta nei Parker ko David Higgins ni vinakati koya me rau na veivacu kei Dillian Whyte se kei Dereck Chisora.

Ia, e kaya ke sega me rau sa na sota ga kei Tyson Fury na jabeni e liu ni veivacu. Ia, o Parker esa vakadruka oti e dua na wekai Fury oya ko Hughie ena dua na nodrau veivacu.