Update: 10:33AM E LAURAI ni duidui tikoga na nanuma ni lewenivanua ena gauna oqo ena vuku ni kena vakayagataki na eticketing ni da vodo basi ka tekivutaki ena i matai ni siga ni vula oqo.
E dua na turaga ni Serua o Ponipate Rakuma, e vakaraitaka ni tuvatuva oqo ni matanitu ena vukei keda meda vakayagataka vakamatau na noda i lavo, ka sa rawa ni da biuta tani toka e dua na i okaoka ni noda veisaumi me laki saumi kina na i vodovodo ni basi me vakatawani kina na nomu tikite ka vakarautaki mai vei Vodafone.
�Vei au, au sa na vakavulici au me�u na biuta tani tiko na noqu ivodovodo ni basi ena dua na macawa, ka rawa talega ni da vakavulici keda me da vakayagataka vakayalomatua na noda i lavo.
�E dodonu me da na cakacakataki keda ga yani e na loma ni tuvatuva levu ni matanitu,� e kaya na turaga oqo.
Mai Lawaki, e Tailevu e kaya mai o Kalisito Binawai ni sa vakaocari ira mera laki volia tale tiko na nodra vodovodo ni basi e na taoni o Korovou me na rawa ni ra vakayagataka na nodra tikite.
� Oqo e sa dua na ka e vakalomaocaoca vei keimami, ka saumi tale tani e $2.50 meda gole ki Korovou me saumi kina na top- up.
�E daumaka me biu ruarua tu ga na kena vakayagataki na tikite se saumi vodovodo ena basi.
�Esa vakavu veitalanoa vakalevu ena bati ni tanoa na kena sa lewai mai meda na vakayagataka kece na lewenivanua na eticketing.
� Keimami taqayataka ke vakacava e dua e tauvimate, ka sega tu na nona i lavo ena tikite, e na caka tu vakacava oya ke via vodo basi me gole ki valenibula?� e kaya o Binawai.
Ia, e kaya na Matabose ni dauvolivoli, ni matata ni ra tovolea vakaukauwa tiko eso na draiva ni basi me ra vakatanitaka na e ticketing ka a mai vakalawataki me sa mai taurivaki e na vula oqo.
�E mai ciqoma na Matabose ni Dauvolivolie vuqa na kudru mai vei ira na lewenivanua ni ra dau gadreva vakaukauwa na draiva na ilavo mai vei ira na pasidia kevaka e sega ni cakacaka na nodra tikidua ni eTransport.
�Na inaki taumada ni kena taurivaki na eTransport me kauta laivi na kena vakayagataki na i lavo qaqa.
Keitou a raica talega ni kena a dau taurivaki na ilavo qaqa me ivodovodo, e ra dau vakatanitaka na draiva na kena dau saumi na ivodovodo.
E so na draiva e ra dau vakatanitaka na kena saumi na ivodovodo ni Stage 2 e $1.11 ka vakatubura e na $1.15, ia ka dodonu me $1.10 .
�E dodonu me ra vakadewataka na nodra i soqosoqo na kabani ni basi e Viti vei ira na lewena na bibi ni lawa ka vauci kina na eTransport sai koya na Omnibus Electronic Fare Ticketing Act 2014 kei na vei lawa kece e vauca.
�E laurai ni levu na kabani ni basi oqo e ra sega ni vakamuria tiko na lawa oqo,� e tabaki ena tabana ni tukutuku ni matabose ni dauvolivoli.
