Update: 10:29AM E VUQA sara na veika e yaco ena vuku ni veitosoyaki, vakabibi ena kena vodoki na basi mai vei keda na lewenivanua ni sa mai vakayagataki ena i matai ni siga ni vula o Okotova na tikite ni basi ka vakatokai na e-ticketing.
Na kena oqo, eda sa vakananumi tiko kina ena veitabana ni tukutuku na noda laki kauta mai ena dua na tabana ni Vodafone na tikite oqo, ka oti oya mo na qai vakatawana kina na i lavo, me rawa ni ko na qai vodo ena basi se lako ki na vanua ko via gole kina.
Ia, e laurai ni levu sara na noda era tiko mai na loma ni vanua, kei na veiyanuyanu era sa na yadua kece na tikite ni basi.
Mai na yanuyanu e Beqa, era sa na gole tale mai ki Navua, era na sauma mai na nodra i vodovodo ni idinicavu e $30 me ra mai cakava kina na nodra tikite ni vodo basi.
Mai na loma ni vanua o Viti Levu, e na koro o Lewa mai Nadarivatu e ra sa loma leqa tiko e so na ilawalawa marama ena kena tawani vakacava na nodra tikite ni basi.
E ra lomaleqataka ni sa sega ni rawa ni ciqomi na i lavo mai vei ira na draiva ni basi, ka sega tu na nodra keria se motoka vakaitaukei, esa na dredre sara vei ira na nodra gole mai ki Tavua se ki Ba me ra na mai vakatawana kina na nodra tikite ni vodo basi.
E laurai talega ni so na basi, e sega ni cakacaka tu na misini oqo me vakayagataki kina na tikite.
Ia, eda vakavinavinaka ni sa veivakadeitaki na Minisitiri ni Vuli ena kena rawa ni ra vodo wale na gonevuli ke bera tiko na nodra tikite ni basi me ra na vakayagataka tiko ni ra gole ki vuli.
Eda na nuidei tu ni dodonu me na raica tale mada na matanitu eso na veika e na rawa ni vakavinakataki ni bera ni qai vakayacori e dua na i tuvatuva ni matanitu, ka me kakua ni vakavu leqa se veiciciyaki na lewenivanua ni ra sebera ni ra vakarautaki ira ena dua na i tuvatuva e sa biu mai.
E laurai ena gauna oqo ni osodrigi tiko na veitabana ni Vodafone ena noda veitaoni na kena sagai tiko na tikite ni basi.
E na daumaka talega me ra na dau nanumi tiko na noda era tiko ena veikoro se i tikotiko e yawa mai ena taoni ka dredre kina na veilakoyaki.
Me dua talega na veiqaravi se dua na i tuvatuva me dau biu vei ira na wekada, baleta ni duidui tu na vanua eda tu kina kei na draki ni bula eda sotava ena veisiga.
Ena i takitaki ni macawa oqo, e a vosa talega mai kina o Nai Talatala Jone Mateiwai ena vuku ni gunuvi vakasivia ni yaqona.
Vakaraitaka o Talatala Mateiwai ni sa tiko saraga ena dua na i vakatagedegede i cake na gunuvi vakasivia ni yaqona mai vei ira na i Talatala, sa bau wili talega eke eso na i Talatala ena loma ni lotu Penitiko kei ira na matabose ni tuirara. E kaya ni sa vosa vakadodonu sara na i Vola Tabu ena vuku ni bula vakavakarau me na bulataka e dua e sa kacivi ki na cakacaka ni talai ni Kalou ena gauna oqo. E vakabibitaka talega o Talatala Mateiwai, ni sega ni dodonu ga na kena vakayagataki na yaqona me vaka era dau kitaka ena gauna e liu o ira na noda qase, oya na vuna e sa mai vakavu leqa tiko kina vei keda na i Taukei ena gauna edai.
