Dredre na qiri

NA dredre ni veitaratara e dau vakavuna sara ga na kena bera na nodra vakau na tauvimate ki valenibula.

E vakadeitaka mai na i tukutuku oqori ki na Na i Lalakai o Valavia Saurara na nasi ka veiqaravi tiko e na Navakasiga Health Centre, e na Tikina ko Navakasiga e na yasana o Bua.

E kaya o Saurara ni rawa ni taura e 25 na miniti mo taubale mai valeniwai ki na dua na delana, ka qai rawa ni la’ki katia kina na nomu talevoni veikauyaki, ni ko via veitaratara ki na valenibula mai Labasa se ki Nabouwalu.

“Na veiqaravi e na vanua oqo e daumaka, ia, na leqa levu ga sai koya na veitaratara e na talevoni, ka ni sega ni bau dua na duru ni talevoni e tiko e na loma ni neitou Tikina.

“E ratou sa mai yalayala na Vodafone kei na Digicel me ratou mai vakacobara na nodratou duru, ia, me yacova mai na gauna oqo, e se sega tikoga.

“Sa i katolu ni yabaki ni noqu sotava tiko na dredre ni veitaratara e na vanua oqo, ka vuqa na gauna e dau tuburi au na loloma e na bera ni nodra cicivaki ki valenibula mai Labasa se ki Nabouwalu na tauvimate e na vuku ni berabera ni veitaratara,” kaya o Saurara.

Kuria ni so na gauna e na davo tu na tauvimate e valeniwai, gole cake o koya ki na delana, la’ki qiriti vuniwai, ni tukuni mai e dua na ka, e na gole tale vei tauvimate, ke vinakata e dua na ka e na baci taubale tale ki delana me la’ki taroga vei vuniwai.

“Kevaka me vinaka tu na gaunisala ni veitaratara, ke’u sega ni veiciciyaki tiko vakaoqo.

“Qo talega e sa dua na tamani cakacaka levu vei au e na noqu la’ki qiri tiko vei vuniwai e na delana, ka’u lesu tale me’u la’ki raica na tauvimate ka davo tiko mai valeniwai.

“Ena so na gauna sa vaka me’u vuturi na veilakoyaki tiko e na noqu la’ki qiri ka lesu tale ki valeniwai, ia, e seva gona baleta niu sa vosa yalayala kina e na noqu qarava na noqu itavi.

“E dau vakaloloma ga o ira na tauvimate e na nodra vosota tiko na wawa, sa vinaka ga ni sega ni dua e vakaleqai na nona bula e na loma ni tolu na yabaki ni noqu veiqaravi tiko e na Tikina oqo,” kaya o Saurara.

Tomana ni 4 tiko na nona koro ni veiqaravi, a ya ko Nasau, Naivaka, Naviqiri, Yaqaga kei na 18 na i tikotiko vagalala.

E kaya o Saurara ni nona vanua ni veiqaravi e dau taubale ki na koro ko Naviqiri kei Nasau, ia, e na dau veitaratara ki Nabouwalu me cici mai na lori kevaka me lako ki Baravi ka vodo waqa ki Naivaka vata kei Yaqaga, e na veigauna kece e siko koro kina.

Tomana ni kedra i wiliwili na veivanua e veiqaravi tiko kina e rauta tiko na duanaudolu duanadrau tolusagavulukavitu (1,137) na lewe ni vanua, ni tauri nai wiliwili mai na yabaki sa oti.

Kuria o Saurara ni veilakoyaki mai na nona i tikotiko ki Nakadrudru (gaunisala levu), e na tiko e na $40 kevaka me saumi e dua na keria.

Sa kerekere vakabibi sara tiko ko Saurara ki na matanitu ka veiliutaki tiko e na gauna oqo, ke rawa ni bau vukei na Tikina ko Navakasiga e na gaunisala ni veitaratara, ka vakakina na gaunisala ni veilakoyaki.

Sa vakau oti na taro ki na Minisitiri ni Bula ena vuku ni veika e rawa ni vakayacori me vakavinakataki kina na veiqaravi ena loma ni vanua o Bua.