Dredre ga mo cegu

Update: 8:55AM Vavi Sikoni
DUA na siga e rau vavi sikoni tiko kina kei na veimataqali keke e dua na veidauveni, ka rau vakaitikotiko e na bucabuca e na loma ni Tebara. Na marama ni lailai na dina mai na yanuyanu ni lumi bulabula mai Gau oqo, e dauvena tiko e dua na marama mai Tailevu ni siga. Se qai tekivu ga na nodrau uli keke, kei na buli valawa, sa waqaci sara na sitovu, ka vakalailaitaki no ga na kena yameyame. Na gauna saraga sa ra vakarau biu kina na keke e na loma ni sitovu, qai rai yani o koya na marama ni Gau ni sa dolava na sitovu o dauvena, ka taura mai na kaukamea (water level) ka dau vakarautaki kina na dodonu ni buloko, ka curumaka yani e na loma ni sitovu katakata.

Gonei dauve na cava o cakava, qarauna de qai kama na ligamu? e taroga yani e na veilecayaki o koya na marama ni Gau.

Sauma ga yani o dauvena ka vaka ne: Segai dauve, au biuta ga e loma baleta me dodonu na kena vatavata de qai vakatabakidua na keke e na dua na yasana. Sa dri yani

Vale ni taralala

Ni qai suka ga mai na cakacaka o Eremodo e na dua na siga Vakarauwai, sa gadreva saraga na lomana me bau vakabatabatataka mada ga yani e na dua na bilo wai dikevi.

Yaco ga yani o koya e na kena vale, sa ota veitarataravi saraga me rawa ni cegu na lomana. Toso tiko na nona gunu, sa vaka me ra rairai vinaka kece ga mai e matana o ira na goneyalewa ka wili talega kina o ira na vakasalewalewa, ia, nai boi ni kaloni li era boroya mai, sa veisiwati totolo saraga kevaka mo volekata yani. Ia, o Modo e sega vakadua ni vinakati ira na goneyalewa, baleta ni sa garova tikoga na nona i tilotilo na bilo bia batabata ka ra qai mai veisivi toka yani na kena buru.

Ni sa lutu mai na i ubi loaloa ni bogi, sa qai vaka e malemaleka ga mai vei Modo na gunu e na kena vale, ka vuki qusia ga na nona buno, e na nona sega ni via calata vakadua e dua na i vakatagi. Kidacala ga o koya ni sa waqa na cina ka vakatakilakilataka mai ni sa voleka na dua (1am) na kaloko ena mataka lailai. Rogo toka vaqo o koya ni ra sa veibuku na goneyalewa me ra toso tale e na dua na vale ni danisi, ka qai dau laki sogo sara ni sa cabe mai o ra-matanisga.

Sega ni bera na nona sa vakamuri ira na i lala goneyalewa qo o Modo. Nona yaco ga yani e tautuba sa raica sara ni dua na i binibini tamata levu era sa voleni tu ena matani katuba ni vale ka ratou lakova tiko yani oya.

Ae….kemudou e caka beka eke na soli dra? e taroga lo e lomana o Modo.

Na gauna e sa voleka yani kina, sa qai kila ni na laini e caka tiko oya, me ra curucuru kina vaka lewe a tini e na dua na gauna. Sa mani vakamuri lewa tu yani o Modo, ia, na gauna saraga e sa yaco kina e na katuba, ra qai biliraki koya na cauravou baleta ni vakaisuluivakataga tiko.

Oti se baci mai laini tale yani o Modo, na ka vataga e yacovi koya e liu, se bai vakaruataki tale e na nodra biligi koya na i lala cauravou ni vakarau sara tu ga me curu.

Na nona qai laubili tale mai e na i katolu ni gauna, sa sega tale ni qai vosota o Modo, ka ni sa kauta mai e dua na i dabedabe, mai biuta e matadra na laini tiko oya, sa qai tukuna yani vaqo ri ne: Uuuuuuuuu……turaga levu, kevaka me da veisugusugu tu vaqo e na dua na katuba ni valenilotu, vaka vei au e na bau vinaka cake.

Nona vosa oti ga oya, ra qai mai rubilaka yani e dua na mata veidredrevaki sa bula, oti sa ra mani tu vakatikitiki na cauravou ka ra lomavata, me sa curu yani o na qase o Modo. Sa dri yani

Volitaki sasa

Dua na gauna e a laki caka vuli kina e dua na marama mai na i cadracadra ni siga mai na Yatu Lau ka i vakalesilesi e na Tabana ni Teitei e na koro ko Vutia mai na loma ni Tebara.

Oqo e na nodra kerei na lewe ni koro me ra kakua ni vakamatea dole tiko na vu ni niu e na nodra dau vakamusuka tiko na drauna me kari kina na sasa.

Na gauna sa vakayaco vuli tiko kina o koya na marama ni Lau qo, e sa qai tarogi ira na lewe ni kalasi se ra dau musu drau ni niu e na veisiga, se vakalutu siga.

Sa qai tukuna o Varinava ni musu ga e veisiga baleta ni sa i vurevure ni lavo totolo ka rawarawa ka qai sega talega ni cakacaka levu. Oti sa qai kaya o qasenivuli me ra yalovinaka sara na marama me ra qai dau kari sasa ga ni oti e ono na vula.

Se ra vakarorogo tu ga sa laveta caka na ligana o Ben kei na nona kaya yani Saka saka….saka….saka.

Io Ben, dua na ka o via tukuna? taroga yani o marama Tau.

Saka na leqa levu saka e tiko nio ira na neimami marama, era sega ni musuka ga na taba ni niu, o ira era vakalutuma talega mai na niu drokai kei na niu madu, oti oya era qai dau mai suwaka yani era. Kemudou e sa qai so na marama kaukauwa o ira na nomudou marama sauma yani vulagi dokai.

Sa dri yani

Latest posts

More Stories