Dredre ga mo cegu

Update: 10:35AM Dredre ga mo cegu

Taro vakawati

Dua na gauna e rau gunu yaqona tiko kina e dua na veivugoni ena nodrau varada ni vale.

Na gauna sa dre kina ko Malolo, sa toso cake talega mai vakamalua na i vakarau ni mateni e yacovi rau na lewe rua oqo.

Dede ga vakalailai sa taro sara o Iliesa vaka: I Momo e dau caka vakacava na vakawati?

Sauma sara mai o nona Momo ni dau kau ga na kamunaga me laki vosaki mai kina na yalewa kevaka e sa vosaka tiko e dua.

E vakaevei vugona, iko sa raica tiko e dua na yalewa? taroga yani o vugona.

Kaya sara o Ili ni rau sa veivosaki tiko kei na dua na goneyalewa ni Bua ka vakaitikotiko mai Naulu.

Se qai tukuna ga o Ili vei nona Momo ni goneyalewa ni Bua ka vakaitikotiko mai Naulu, sa kila saraga ni vasu tikoga vei ratou mai Kadavu.

O cei na yacana vugona, ka vasu talega i vei? taroga yani vakababa o nona Momo.

Sega ni bera ni sa cariba yani na yacai goneyalewa kei na nona koro ni vasu.

Kaya ga yani o Vugona: Paikaraiki…vugona, na noqu vasu saraga qori, ia, kakua ni leqa, daru sa na laki vosaka saraga me mai watimu.

Isa Momo vinaka saraga vakalevu e tomana yani o Ili, Vavei sa rawa ni daru laki vosaka saraga mai ni mataka?

Sa dri yani

Maleka ga na sucu i Na

Na gauna e sa yabaki 5 kina o Mika e dau matau no ga vua na gunu sucu vei tinana, ka sega ni vinakata na sucu ka uli e na tavaya.

Kevaka e qito sara tiko mai vei se veimuri tu kei iratou na tuakana, na gauna ga e via gunu sucu kina, e sa na gole sara mai ka mai vakaraviravi tu ga vei nona Nana.

Ia, o tinana talega e dau kila vinaka saraga ni sa baci via gunu sucu mai o Mika.

Sa vaka me matau tale tu vei ira na nona i caba, ka ni sa dau yali ga o Mika, oya era kila sara na vanua e lako kina.

Dua gona na siga ni baci kaukauwa mai na nona via gunu sucu o Mika, sa cici sara yani ki nodratou vale ka raici rau sara na nona i tubutubu ni rau veitalanoa tiko kei na so na wekadratou.

Ni se bula sara tu ga na nodratou veitalanoa, sa lai vakaraviravi tu mai o Mika e na nodratou katuba ni rumu, ka yalovi tinana lo tiko me ratou kakua ni raici koya na vulagi.

Kila saraga o tinana na cava e sa bai loma i na luvena mai ka tatau sara vei ratou na veiwekani, me se gole mada i na rumu.

Se ratou rogo tikoga na tiko e loma ni vale, sa vosavosa tiko o tinai Mika e na nona tarogi koya se via gunu sucu se sega.

Oti oya e dreti koya yani me gunu sucu, ka biliga o Mika na sucu i tinana kei na nona tagi tiko me kua ni rogo i cake.

Oi auwe… na cava e manati iko tiko gone lialia, ko ta via sucu? e taroga yani o tinana.

Sauma tagitagi ga yani o Mika vaka ne: Oilei Na.. e sa rui boi kaukuawa kina a tapako.

Sa dri yani

Mateni ena yaqona ni Viti

Ni se bula sara tikoga na tauratale kei na mamawe ena gauna e vakamau kina o Paula, sa rogo mai na domo ni kaila e na dua na loga ni veitavioka.

Nodra rai yani vaqo na goneyalewa vulagi ka ra soqo tiko e na siga oya, ni rau sa veitaubeni tu mai na veitacini o Tuvou vata kei Eremodo.

Sa dua na ka na levu ni nodra rere na goneyalewa, baleta ni sa dradra tu ga mai na matai Tuvou, kei na ligana ruarua.

Isa, e kuvai o koko, o kodrau moro lesu mai na vei buturaki? taroga yani e dua na goneyalewa vulagi.

Warai naita, sau oca sarala na vakavesuki taciqu qo, na kaukauwa ni mateni ni yaqona e tiko vua e vakavuna meu qiqi talega era baleta ni sega niu rawata na kena bibi, ka ni tamata levu toka vei keirau, kaya yani o Modo.

Ia, na cava ga e sega ni dradra kina na matamu kei na ligamu? taroga yani o naita.

Sega naita baleta e levu na gauna e dau cokata kina o koya na gaunisala, o au qai dau taqa toka ga yani i dakuna, baleta niu tamata lekaleka vei kei rau.

Sa dri yani