SO NA bogi ni keimami dau lesu mai na gunu yaqona mai na koro ko Nasau, me keimami lesu tale tiko ki Naviqiri, e na Tikina ko Navakasiga e na yasana ko Bua, keimami dau nanuma tale ni ra sa veitalanoa tiko na tevoro e na lomaloma ni bogi.
Oqori na nona i vakamacala o Sailosi Turaga e dua na turaga ni Naviqiri, mai na yasana o Bua.
E kaya o Turaga ni dua na dredre levu era sotava tiko na lewe ni Tikina ko Navakasiga ena nodra sasaga qiri vei ira na wekadra era vakaitikotiko e na veiyasai Viti.
Tomana ni o iratou na lewe ni koro ko Nasau e ra na taubale cake ki na dua na delana, ka rawa ni taura e 25 na miniti, me ra qai la’ki qiri kina.
Ni qai dau tau na uca, sa dredre sara ga na veitaratara e na vuku ni yawa ni vanua mo taubaletaka, ka vakakina na batabata ni bogi.
“So na gauna keimami dau vakasamataka, isa, rairai keimami sa guilecavi beka na wekamuni e na yawa ni vanua keimami tiko kina.
“Sa gole oti na veitalanoa kei iratou na tabana ni Vodafone kei na Digicel, ka sa tukuni tiko ni na mai vakaduri e dua na nodratou duru e na delana o Maqevesi.
“Ia, me yacova mai na gauna oqo, e se bera ga ni dua na irogo e lesu tale vei keimami,” kaya o Turaga.
Kuria o Turaga ni bau vinaka toka na nodratou koro ko Naviqiri, ka ni rawa ni ko taubale ga e rua na miniti, o sa yacova na vanua e katia kina na talevoni veikauyaki, ia, e sega ga ni tautauvata mo tiko ga e na nomu loma ni vale dakoba, ka veitabayaka na nomu nabani talevoni, ka mai veitalanoa welewelei yani. Sa nuitaka tiko o Turaga ni ratou na rai sara vakayalomatua o iratou na tabana ni Vodafone kei na Digicel, ka vakabibi na matanitu e veiliutaki tiko e na gauna oqo, ke rawa ni ra vakacegui na Tikina ko Navakasiga e na tabana ni veitaratara.