Dolavi na valenivuli vou e Sawani

Update: 10:45AM ERA VAKAMUDUO ka ra kureitaki liga na lewe i Vuna raraba e na siga Vakaraubuka ni macawa sa oti ena kena dola e dua na nodra valenivuli vou, ka vakavinakataki talega na valenivuli makawa.

Ni qai voleka toka na veimama ni tini e na mataka lailai ni siga oya, sa tadu yani na i lakolako vakaturaga ena rara ni koronivuli, ka sa wawa toka mai na vanua me vakayacori na veikidavaki vakaturaga.

Ratou vakaitavi na qase ni vanua ko Vuna e na kena vakayacori na i vakasobu vua na noda i Liuliu ni Matanitu, ni bera ni qai gole yani ena vakatunuloa, ka sa wawa toka mai kina o Ro Macanawai Raicebe na gone turaga na Tui Vuna.

E vakayacori vua na Paraiminisita ni noda vanua na veiqaraqaravi kece vakavanua ni bera ni qai laki dolava na valenivuli vou ka rauta ni $500 na udolu na dola na kena i sau vakailavo.

Vakaraitaka o Asaeli Naiteqe ni a vulici vou saraga na meke ni yaqona ka vakaitavi kina o Ratu Sikeli Boladuadua.

Oi keitou qoi na dau buli sere kei na meke me vakataka na Caucau ni Waimanu kei na vuqa tale, e kaya.

Tomana ni taura ga e rua na macawa na kena vakatavulici vei ira na cauravou na qaqana, na kena i lagalaga kei na kena meke ni sa tutaki yani vua na Vulagi Dokai.

Kuria o Naiteqe ni koronivuli oya e a tekivu ga mai na koro ko Sawani ni bera ni qai tokitaki mai ki na vanua ka sa dabe toka kina e na gauna oqo.

E vakavinavinakataka vakalevu na noda matanitu na koro ko Vuna, baleta ni sa dodonu me sogo na koronivuli mai vei ratou na Tabacakacaka ni Vuli kei na Tabana ni Bula. Ia, e na nona rai vakayalomatua o Brigadier General Tikoitoga sa qai tukuna kina vua na Tabana ni Matai kei na Idinia ni mataivalu, me ratou veivuke ena kena vakacokotaki cake tale na koronivuli, me rawa ni ra vakavulici kina na kawa kei Viti ni mataka.

Tomana o Naiteqe ni yabaki dua ga vakacaca na kena tara na koronivuli vou, ka vakakina na kena vakavinakataki na koronivuli makawa, ka wili talega kina e dua na vale ni wilivola (library).

Tinia ni ra sa bosekataka tiko na i tubutubu ni gone ni vanua o Vuna, ni yabaki mai oqo era sa na gole lesu tale ki na nodra koronivuli ni Tikina o ira na gone ni Vuna kalasi 1 ki na 8 ka ra dui vuli tu e na vei koronivuli e na kedrau tadrua o Suva kei Nausori.

Latest posts

More Stories