Dodonu mera cakacaka

E DUSIMAKA tiko na i soqosoqo na Fiji Labour Party ni na vakaduria e dua na tabana ka vakatokai na National Service Scheme ka oka kina na veiqaravi e na veitikotiko kei na veivakatavulici ni vulitara me baleti ira na i tabagone era tawa cakacaka.

Ratou vakamatatataka ni ko ira era na oka e na veiqaravi oqo era na saumi tiko.

Kaya na peresitedi ni soqosoqo o Lavenia Padarath ni dodonu vei ira na tagaane kei na marama bula mera marautaka na dodonu e na nodra vakacakacakataki.

Na levu ni tawa cakacaka e sa i vakaraitaki ni leqa ni bulau vakailavo e na noda vanua, kaya na marama i taukei oqo, o Padarath.

Tomana ka vakamacalataka ni na sega ni matata se daumaka na bula vakailavo e na noda vanua kevaka ena sega ni vakadaberi na matanitu veiliutaki e na galala kei na kena rokova vakadodonu na lawa.

E na nodra i tuvatuva ni veiqaravi e ratou dusimaka ni ratou na kauta lesu tale mai na yabaki na ni vakacegu e na 60. E na gauna oqo e sa yabaki tiko ni vakacegu ka vakarautaka na matanitu veiliutaki oqo na yabaki 55.

Levu vei ira na lewenivanua ka ra yaciva na yabaki oqo era sa dau matua vinaka e na kila vakacakacaka, ka rawa ni yaga sara vakalevu na nodra kila e na vuku ni rawa-ka ki na bula vakailavo ni matanitu.

E vakaraitaka na FLP ni dua na i wiliwili levu ni tamata cakacaka mai vanuatani era sa kovea tani na cakacaka mai vei ira na lewenivanua oqo.

E sa vakaraitaka o Padarath ni sa vakadikeva tiko vakavinaka na i soqosoqo na tikina oqo e na kena maroroi na cakacaka me baleti ira na noda lewenivanua e Viti.

Ia, sa kacivaka talega na FLP ni na vakaduria e dua na tobu e na nodra rawa-ka vakailavo e dua, ka oka kina na kena vakadrui e dua na tabana ni volaui ni bisinisi e na taudake ni koro lelevu vakavavalagi.

Latest posts

More Stories