Dodonu beka mera tiko mai Syria na noda mataivalu

ERA vakaitavitaki ira tiko na noda sotia e na rua na ka lelevu.

Ai matai na nodra vuaviritaki tiko na nodra matanitu, ka kena i karua e na nodra gole tiko ena veisaututaki ki na veiyasai vuravura. Na veika e rua oqo era lomatarotaro tiko kina na lewe ni vanua, ka vakavuna tu na nodra laki vesu e lewe 45 na noda lewe ni mataivalu vei ira na batikadi mai Syria e na macawa sa oti.

E dina ni 3,500 na kedra i wiliwili ka ra veibiuyaki tu e na tabana ni veisaututaki e na veiyasai vuravura, ia, e sega ni tiko vei ira na i yaragi me ra rawa ni vorata kina kevaka e dua na dau vakacaca(rebels) e via curu botea yani na nodra i tikotiko

E vakaraitaka mai e dua na Tabana ni vola i Tukutuku mai valagi (Associated Press) ni tekivu mai na yabaki 2006 e se sega vakadua ni ratou bau veiwasei kila vakaivalu vata kei ira na nodra i tokani vakamataivalu mai Ositerelia, Niu Siladi vata kei Amerika, e na gauna e ratou taura kina na noda matanitu ka rauta ni 900,000 na keda i wiliwili.

Tomana ni ratou sega mada ga ni kila se e vica mada na kedra i wiliwili na tauri vakavesu mai Golan e na macawa sa oti, ka ra tiko kina ena ruku ni vakatulewa ni U.N. ka qarava tiko na vanua rerevaki duadua e na kedrau veimama o Isireli vata kei Syria, ka sa oti oqo e 400 na yabaki.

E vakaraitaka o Jone Baledrokadroka na (Land Force Commander) vakacegu, ka sa cakacaka tiko mai na Univesiti mai Ositerelia e na gauna oqo, ni sa rui vakatotolotaki na nodra vakau na nodra sotia ki na Golan Heights.

E vakabauta deivaki o Baledrokadroka ni ra se bera ni vakarautaki vakavinaka ka sega ni tiko vei ira na kila kei na tereni me rawa ni ra taqea kina na veivaluvaluti e caka tiko mai Syria.

E vakamacalataka o Osnat Lubrani na mata ni U.N. ka tiko e Viti, ni dodonu me laurai vakavinaka na nodra vakaukauwa yago ka me tu vakavinaka na noda sotia e na veigauna kece.

Tomana ni naki levu ni nodra gole e na veisaututaki e kilai vinaka tu ni na sega ni rawa ni dua na ka vaka oqo e na laki yacovi ira.

Kuria o Lubrani ni macawa sa oti e vakayacori tiko kina na masumasu kei na vakawaqa kadrala e na valenilotu na Seniteneri e Suva me i vakananumi ni na noda liga ni wau ka ra tauri tiko vakavesu me vei ira na nai i lawalawa ni al-Qaida-linked Nusra Front ki na dua na vanua ka  sega tiko ni kila, me vakatekivu mai na i ka 28 ni siga ni vula ko Okosita.

E kaya talega o Lubrani ni sa balavu sara mai na nona vakaitavitaki koya tiko o ira na noda sotia e na veisaututaki e na veiyasai vuravura, e dina ga ni sa vakayacora oti e tolu na vuaviri, ia, sa vakadeitaka na i liuliu ni mataivalu, ni ratou na tutaka na matanitu ka digitaka na lewe ni vanua e na macawa mai oqo. Tomana ni matanitu na U.N. e sa guilecava na leqa e yaco tiko e na noda vanua ka tu vakarau me vukei Viti e na nodra yalo qaqa ki na veisaututaki ena vei yasai vuravura, ia, vei ira na noda sotia era marautaka sara vakalevu baleta ni oya e dua na vanua e rawa nira rawa i lavo kina vakalevu.

Ia, e na yabaki 2009, e a vakatoka kina o Murray McCully na Minisita ni Veitaqomaki mai Niusiladi ni dua na tabana veilecayaki na U.N.

E kaya o McCully ki na niusiveva na New Zealand Herald se rawa vakacava me ra gole ka laki veisaututaki ki na dua tale na vanua, nira vuaviritaka tiko mada ga na nodra matanitu.

Kuria ni sa veisautaka tale na nona vakanananu baleta ni sa yalataka o Viti ni na vakayacora na veidigidigi, ka lomasoli na matanitu o Niusiladi me veivuke vei ira na sotia ni Viti.

Kaya talega o James Brown, e dua na Kanala vakacegu ni Ositerelia, ni dina ni mai yaco na vuaviri e na yabaki 2006, ia, era uasivi na sotia ni Viti.

E vakaraitaka mai na (A.P) ni so na sotia ni Viti era vesu tiko e na gauna oqo, era se bera ni gole vakadua ki na dua na lakolako ni veisaututaki, ka ra qai laki biu sara tu ena vanua rerevaki me vakataki Syria.

Ia, e vakaraitaka o Brig. Gen. Mosese Tikoitoga ni ra veicurumaki tiko na sotia gone kei ira na sotia qase, ka kaya ni vei vanua vou era dau lako kina, era kau talega na sotia ka ra a se qai rawata ga na nodra naba.

Kuria ni se qai matai ni gauna oqo mera sotava na noda sotia na veivakalolomataki e yaco tiko mai Syria.

E kaya nira se qai sotava vakadua me musu na domodra na lewe ni vanua mai vei ira na dau vakacaca, ka vakayacori sara tu ga e na yasa ni vanua era yadrava tiko. Ko ya e na rawa ni vakamalumalumutaka na nodra vakasama na noda sotia.

Tomana o Tikoitoga ni sega ni veiraurau na nodra i yaragi vata kei na yaragi ka tiko vei ira na dau vakacaca, ka duavata kei na vakatutu e vakatulewa kina na Komada ni U.N. oya me ratou sa soli ratou ga yani ka vakasuka na nodratou i yaragi.

E ratou vakaraitaka na sotia ni Filipaini ni dodonu me na vaqaqai na Komada ni U.N. ka a tukuna talega me ratou soli ratou yani vei ira na batikadi, ka ratou qai bese.

Kuria o Baledrokadroka, ni dua sara na ka veivakurabuitaki ni ratou soli ratou yani na noda sotia, ka ratou dro rawa na sotia ni Filipaini. Kaya o koya ni i tavi ni dua na sotia me kua ni tu vakasuka ka soli koya vakarawarawa tu yani vaka oya, ia, e dodonu me vorata na meca.

Tomana ka kaya ni oqo e dua na i tukutuku era na sega ni ciqoma vakarawarawa na sotia luvaisulu.

E dua na rogorogoca levu, ka ni sa kilai vinaka tu na sotia ni Viti e na i matai ni valu levu kei vuravura me yacova mai na gauna oqo. Ia, e vakaraitaka mai o Gen. Gregorio Pio Catapang ni rairai e sega ni dua na gauna ni nodratou vakarau vinaka na sotia ni Viti e na nodratou vakidacalataki ratou na i lala batikadi oya.

E dredre talega na tara na nodratou dau ni vosa na matanitu na U.N. ena macawa sa oti.

Tomana o Tikoitoga ni na sega ni vakasuka na noda mataivalu ena veisaututaki ki Syria, ka sa tu vakarau tale e lewe 45 me ra veisosomitaki ke ganiti mai yasana kadua.

Ia, e vakaraitaka o Baledrokadroka ni oqo e vaka tale tiko na caka i ba. E kaya ni qo e vaka toka e dua na i tukutuku mata ni davui ka ni laurai na vo ni veimatanitu, era sa vakasuka tiko mai na nodra sotia mai Syria, ia, o Viti ga e cakava tale na kena veibasai.

E na yabaki sa oti e rau sa vakasuka mai kina na nodrau sotia na matanitu o Austria kei Croatia e na nodrau nanuma ni na rawa ni yaco vei ira na ka e caka vei ira na noda sotia.

Ratou sa kaya talega na sotia ni Filipaini ni ratou sa na cegu mai keya ena vula ko Okotova, ka vakakina o ira na sotia ni Ireland. Ki vei ira na 1,250 sotia e ra tiko mai kea e oka tiko kina o Idia, Nepal kei Netherlands. Na matanitu na U.N. e sauma tiko e $1,028.00 dua na sotia e na loma ni dua na vula, ia, e kaya kina o Baledrokadroka de rairai na vuna oya era veisugusugu tiko kina na noda sotia me ra gole ki kea e na veiyawaki ni sau sa vaka tu oya, ka vakabibi tiko vei ira na sotia vou oqo.

Latest posts

More Stories