Dei vinaka tu ga na sau ni vanua

Update: 8:36AM E VAKARAITAKA na turaganikoro mai Laselase o Anare Baharo ni se bula ka mana vinaka tiko nodra sau na noda Turaga Bale ena gauna nikua.

Oqori ena kena laurai ena uciwai levu ena Sigatoka ena kedrau tadrua na wavu e rua e vica na qio ni donuya tiko nodra a keba tiko e Laselase na timi ni rakavi ni Cakaudrove ena vakavakarau ni sota kei na Naitasiri North Bulls ena macawa sa oti.

Tukuna o Baharo na koro o Laselase e donui iratou na mata ni katuba mai vei ira na Turaga Bale na Kalevu ki vei ira na Turaga Bale na Tui Cakau.

Keimami raica e rua na luve ni qio ni rau kabi voli e na bati uciwai e Sigatoka voleka mai Laselase ena gauna era a keba voli kina e na koro na timi ni Cakaudrove ka vakaraitaitaka oqori na nodra sau na noda Turaga ena sega ni oti vakadua, tukuna o Baharo.

Kuria ka kaya ena nodra a gole mai na timi ni Cakaudrove era keba tiko e valenisoqo e Lawaqa ea qai qiritaka mai na Turaga Bale na Tui Cakau mera biuti Lawaqa ka ka gole mai Laselase baleta ni keimami tiko kina na nona mataki ki Nakuruvarua.

Ena kena caka na vakataraisulu vei ira na marama Bale na Roko Tui Dreketi ka a vakayacori mai Cuvu ena vica na yabaki sa oti, era a vakaicili tiko e na koro na Turaga Bale na Tui Cakau ka keimami matalau ena vica na siga ena neimami raica e matana votu e vica na drau na luve ni qio se Ai Sokula e na uciwai levu oqo o Nasigatoka, e kaya.

Ia, na siga ga era a biubiu kina na Tui Cakau,era sega tale ni qai laurai na qio ka tukuna tu oqori nodra yadrava tu e dua na Turaga Bale kei Viti.