Dei na vitu

ENA dikevi ratou tale na nona cauravou dauqito o Gareth Baber na dauniveivakatavulici ni timi ni Fiji Airways Fiji 7s ni bera tiko ni qai digitaka na nona lewe tinikatolu na dauqito mena matataki Viti ena sotasota ni Commonwealth mai Gold Coast ena mua ni macawa qo.

E ratou sa tiko mai Ositerelia ena gauna qo ni oti na nodratou a laveta na rara mai Hong Kong ena va na yabaki veitaravi.

Ia, na lewe 13 na dauqito ka a kacivaki taumada me na vakaitavi ena Commonwealth ko Semi Kunatani, Jasa Veremalua, Josua Vakurinabili, Paula Dranisinukula, Kalione Nasoko, Jerry Tuwai, Vatemo Ravouvou, Amenoni Nasilasila, Sevuloni Mocenacagi, Mesulame Kunavula, Eroni Sau, Alasio Naduva kei Samisoni Viriviri.

E vakaraitaka tiko o Baber ni na rawa ni vakayacori eso na veisau ena timi me na qito ena Commonwealth kevaka e mavoa tiko eso na dauqito.

Na timi n Viti ena sota tiko kei na timi ni Sri Lanka ni oti na 1 ena 21 na miniti ena sigalevu ni Vakarauwai, ena sota kei Uganda ni oti na 7 ena 53 na miniti ena bogi ni Vakarauwai, ena qai sota tiko kei Welesi ni oti na 11 ena 33 na miniti ena i otioti ni qito vakatobu ena bogi tikoga ni Vakarauwai.

Ena sega tiko na kota fainala ka ra na cabe cake ga e va na timi ka ra liu mai na va na tobu ni qito kina semi fainala ni oti na 1 ena 43 na miniti ena Siga Tabu, na fainala ena vakayacori tiko ni oti na 5 ena 4 na miniti ena yakavi ni Siga Tabu.

Ia, e dei tikoga na nona tukutuku o Baber ni vinakata me na rawata na koula o Viti ena nona qito tiko ena mua ni macawa qo mai Ositerelia ena sotasota ni Commonwealth.