Dabe ni palimedi

E VAKABAUTI ni dua na i wase levu ni lewe ni palimedi era na dabe tko e na i matai ni gauna ena lvuku ni kena veivosakitaki na veika e baleta na bula ni lewenivanua ka vaka kina na o Viti raraba.

Oqo na buturara ni veika vakapolitiki ka cauraki kina na veika eso ka rawa ni vakavuna na tubu ni dra, ia, e na gagadre me vakatakilai kina na dina.

Sa na dodonu me ra na vakaiyaragitaki ira vakavinaka e na dina kei na kila e na veitarotarogi e dau vakayacori e na vuku ni ulutaga e dau veivosakitaki e na dua na dabe ni palimedi.

E na tiko na i Vakaro e so ni palimedi ka dodonu mera kila deivaki na lewe ni bose e na kena vakamuria vakavinaka.

Namaki me dua na vanua osooso talega na Vale ni Tabacakacaka ka sa na tiko kina na palimedi oqo, mai vei ira na lewenivanua ka ra na gadreva mera na raici ira na nodra Mata e na vuku ni leqa eso me vaka ga na kena i vakarau.

A dau dabe e liu na palimedi e na Vale ni Tabacakacaka ni bera ni mai yaco na vuaviri e na 1987, ka sa mani tokitaki yani ki Nasese e na vanua e a yaco kina na vuaviri ni 2000.

Sa ra dui vakanamata tu na tolu n ai soqosoqo vakapolitiki ka na matataki keda tiko na lewenivanua e na loma ni palimedi e na i tuvatuva ni nodra i soqosoqo ka ra a vunautaka wavoki ni bera na veidigidigi me na bau vakavatukanataki.

E na namaki me na tadre vakalailai na vakatutu eso me vaka ni sa tiko na i To ni Veisaqa.

Oqori e na kena na kacivaka tiko yani me na savasava ka matata na veika e biu e na dela ni teveli me rawa nira bulagoci kina na lewenivanua ena veika vakacakacaka ni veiqaravi.

Sa dodonu me vakavinavinakataki talega na Paraiminisita e na nona vakaraitaka e na dua na mala ni nona vosa ni sa tu vakarau me na cakacaka vata kei na i To ni Veisaqa e na vuku ni cavuikalawa nei Vitie na veisiga nimataka.

Sa na tu na lewenivanua mera wanonova matua na veika e na veika e na cauraki se tuvanaki me baleta na nodra vukei e na veilewa eso e na loma ni vale ni bose.   

Sega walega ni koya oqori, e na vakatalega kina veivakatorocaketaki e na veiyasana.

Sa ra doladola mai na veimatanitu qali Vakaperitania e na vuku ni veivuke ka vakabauti ni na levu sara na gauna e na vakayacori kina na dabe ni palimedi.

Oqori e na vuku ni veivuke, veivakacakacakataki, vuli, ka rawa ni vukea na cavuikalawa ni noda vanua.

Ia, na vinaka, kena drodro vinaka ni veivosaki kei na maucokona e na vakatautaki e na dola ni bose e na mataka ni Moniti ni macawa mai oqo.

Aya na kena dulaki cake na veitataunaki taumada vua na Kalou Bula, o Koya na Daunilewa.

Sa tu na nodra vakanuinui na lewenivanua dau veidigitaki Mata ni na vuavuai vinaka ka vakavatukanataki na i naki ni nodra digidigi, ka ra na matataki vakavinaka talega e na loma ni palimedi.

Kuria oqori e na nodra na dau sikovi e na so na gauna me vakota dei tiko ga na i sema ni veiwekani ena vuku ni i toqa ka tarava.

Oqori e dua na tikina era a dusi kina eso na lewe ni palimedi e liu e na vuku ni nodra a sega ni bau sikovi mai vei ira na nodra Mata e na dela ni gauna ni nodra veiqaravi me yacova tale ni sa voleka na veidigidigi.

Ia, ni sa na dabe oqo na palimedi e vakabauti ni sa na saumi kina e vuqa na lomatarotaro.

Latest posts

More Stories